BJP-in Rotluanga suspend-na hlih an phût

BJP, Mizoram Pradesh chuan thuchhuah siamin, Nalanda Institute of Advance Studies (NIAS), Kolkata-a Mizo zirlai thawn a nih danah thil dik lo a awm ngaia an ngaih thu an tarlang a; chumi kaihhnawiha officer suspend, Rotluanga chu suspend a nihna hlîp turin sorkar an phût.

MIzoram BJP chuan, NIAS-a zirlai thawn a nih danah leh MCS officer suspend a nih danah thil fel lo tak a awm niin kan ngai. A mawhphurtua puh MCS officer Rotluanga suspend a ni hi mak kan tiin hriatthiam har kan ti. Labour, Employment & Industrial Training (LEIT) director hlui Rotluanga hi May 13, 2017 ral hma ngeia re-instate turin Mizoram sorkar kan phût a ni," an ti.

BJP chuan, Rotluanga chu zirna-in lem (fake institution) nena MoU ziakah leh fake institution hnena zirlaite zirna senso atana cheng nuai 128 a lo pek avanga suspend anga tarlan a nih laiin, March thlaa Assembly session-ah Mizoram sorkar hotute'n NIAS chu zirna in lem a nih loh thu an sawi si niin an tarlang a; NIAS chu zirna in lem a nih loh chuan Rotluanga suspend chhan tur a awm loh thu an sawi.

NIAS-a zirlai tirh chung­changah Congress party MLA pahnih - Lalrinmawia Ralte leh T Sangkunga chu mawhphurtu ni ngeia an ngaih thu sawiin, BJP chuan, MoU reng rengah sorkar official-te'n hming an ziah ṭhin angin, MoU ziah laia LEIT Director chuan sorkar aiawhin hming a ziak mai niin an tarlang.