Meizial eng emaw zat man a ni

World No Tobacco Month bul ṭan nan nimin khan Mizoram State Tobacco Control Society (MSTCS), Legal Metrology leh Mizoram police-te chuan a rualin district hrang hrangah Joint Anti Tobacco Drive an nei a, dan loa meizial lak luh eng emaw zat an man.

District hrang hranga meizial an mante hi ram dang aṭanga lak luhte a ni hlawm a; COTPA danin a phût ang vaukhànna thu leh a lem (pictorial health warning) bakah, Legal Metrology danin tarlan tura a phût (declaration), a man zat leh a siamtu hming leh address, lak luh ni leh kumte tarlan a nih loh vanga man a ni.

Hriat theih chinah nimina drive an neihnaah hian Aizawlah foreign cigarette báwm 410 man a ni a, Lungleiah COTPA Section 6 bawhchhia mi paruk man niin, dan angin pawisa chawitir an ni. Kolasib-ah mi 25 leh foreign cigarette báwm 486, Lawngtlaiah foreign cigarette báwm 422, Serchhipah foreign cigarette bawm pathum leh Shikhar báwm 11 leh, Mamitah foreign cigarette báwm 32-te man a ni bawk.

May 31 hi World No Tobac­co a ni a, kumina thupui tur chu 'Vaihlo hi hmasawnna tibawrhbángtu a ni' (Tobacco - A threat to development) tih a ni ang. May thla pumpui hi World No Tobacco Month-ah puan a ni bawk a, he mi chhung hian vaihlo leh a kaihhnawih donaah ngawrh zawka hmalak tum a ni.

Chief minister Lal Thanhawla chuan May 3, 2016 khan dan loa vaihlo leh a kaihnawih lak luh leh zawrh chhuah tihrêm a nih theih nan Legal Metrology, Taxation department, Police CID Crime leh MSTCS-te thawhhona 'Joint Operation on Contraband Cigarettes and Other Illegal Tobacco Product' a hawng a; chumi hnua vaihlo leh a kaihhnawih man tawh zawng zawng hlut zawng belhkhawm chu Rs. 33,42,600 a ni.

Dan loa vaihlo leh a kaihnawih lak luh aṭanga sorkarin chhiah a hloh chu kum khatah Rs. 10,02,780 anga chhût a ni bawk.