KHAWTHLIR

HSLC result
Mizoram Board of School Education (MBSE) chuan vawiin chawhnu dar 2 hian High School Leaving Certificate (HSLC) Examination 2017 result a tichhuak dawn. Result hi Chaltlanga MBSE office-ah leh website www.mbse.edu.in ahte en theih a ni ang.

H/S jubilee lawm
Hnahthial High School chuan nimin khan an sikulah golden jubilee an lawm. Jubilee lawmna hi he sikula zirtirtirtu hmasa leh a dintute zinga mi K Lalhluna'n a hawng a, headmaster hmasa ber RL Laltawnga'n jubilee hriatrengna lungphun a hawng bawk. Hnahthial H/S-ah hian zirlai 160 leh zirtirtu panga an awm mek a ni.

Volleyball Vice president
Volleyball Federation of India (VFI) vice president atan Dr Lalmalsawma, Kulikawn thlan a ni. Dr Lalmalsawma hi April 11, 2016 khan thlan tlin a ni tawh a; mahse, VFI hi Court-ah khin an nih avangin an function zui thei lo a, Court-in VFI khinna a hnâwl tak avangin tun hnai khan thlan tlin a nihna chu hriattir nawn leh a ni.

Kai sang
Anthony Lianzuala, Indian Civil Service Account (ICAS) chu tun hnai khan Controller General of Account-ah a kai sang. Anthony Lianzuala hi ICAS 1982 batch a ni a, Mizo zinga sorkar laipuia account lama hotu lu ber ni thei hmasa ber a ni.

Thisen pe
Serchhip Chhimveng Branch KṬP-te chuan April 29, 2017 khan Serchhip Blood Bank tan thisen unit 31 an pe a, a petute mipa 22 leh hmeichhia pakua an ni.

Sorkarin rál
Mizoram sorkarin accredited journalist thite ràlna a pek ṭhin Rs. 1,50,000 nimin khan Kolasib-a Rammuan chanchinbu editor thi ta, K Lalthlamuana chhungte hnenah hlan a ni. K Lalthlamuana hi nikum October thlaah a thi a, Mizoram sorkarin a ràlna hi a nupui Rengthanpuii hnenah IPRO JH Lalparmawii'n a hlan.