Champhaia sorkar pisa dan tum ṭhulh Sorkar a tláwm dawn lo - Chief Minister

Champhai District Hospital-a doctor dah belh tur a, sorkar nawr nana Champhai Joint Action Committee huaihawta vawiin aṭanga Champhai khawpui huam chhunga sorkar pisa zawng zawng dan tum an tum chu ṭhulh rih a ni. Hetih lai hian, chief minister Lal Thanhawla chuan, harsatna siam hrim hrim vangin sorkar a tlàwm loh tur thu a sawi.

Champhai JAC hian tun hnaia Aizawla sorkar hotute an dâwrnaah thu lawmawm lam dawng loa an inngaih avangin, April 29, 2017-a Champhai Kahrawt YMA Hall-a an ṭhutkhawmnaah, May 3 aṭangin tiam chin awm loa Champhaia sorkar piasate dan an rêl a ni.

Champhai JAC-ah hian tlawmngai pawl hrang hrang aiawh te, Champhai V/C Association aiawhte leh political party hrang hrang aiawhte an tel a; chairman chu Champhai District V/C Association chairman K Lalmawia niin, secretary chu NGO Coordination Committee secretary Dr Laldinthara a ni.

Vawiin aṭanga sorkar pisa dan an tum chungchang hi nimin chawhnu khan YMA sub-headquarters, Champhai pisaah Champhai JAC hruaitute chuan palai hna thawktu Central YMA hruaitute nen an sawiho a; CYMA ngenna angin sorkar pisa dan chu an ṭhulh rih. CYMA aṭanga palai hna thawktute hi CYMA president Lalbiakzuala nen mi pakua an ni.

Nimin chawhnua meeting-ah hian Champhai JAC-te chu doctor an mamawh belh dan te, doctor tam tawk loh vanga mipuiin harsatna an tawh dante an sawi a; CYMA hruaitute chuan, an harsatnate chu sorkar hotute hnenah thlen an tum thu sawiin, tun kar chhung lo ngaihchang phawt turin CHamphai JAC-te an ngen.

Champhai JAC chuan CYMA ngenna chu zahawm an tih avangin, an ngenna angin tun kar chhung ngaihchàn leh phawt ni se, an ti a; hei vang hian vawiin aṭanga tiam chin awm loa sorkar pisa zawng zawng dan an lo rel tawh chu an ṭhulh rih a ni.

Hetih lai hian CM Lal Thanhawla chuan nimina Siahaa vantlang inkhawma thu a sawinaah Champhai District Hospital-a doctor dah phûta sorkar nawr chungchang a sawi a, "An harsatna siam hrim hrim avangin kan sorkar hi a tláwm dawn lo. 'Sorkarin doctor 26 kan la dawn a, in mamawh an tel hlauh chuan kan pe ang che u,' tih laiin, ringtute'n hetiang thil chhia an ti duh dawn em ni, tih turin motor an hâl a, Circuit House an tichhia a ni," a ti.

Chief Minister chuan, Mamit, Siaha leh hmun dangte pawhin doctor an mamawh tih sorkarin a hriat thu sawiin, "Buaina an siam ve lo, an puitling ka ti," a ti a; doctor chu buaina siam vanga neih ngawt theih a nih loh thu a sawi.

Champhai JAC hruaitute hian April 25 leh 26 khan Home minister R Lalzirliana a chenna inah an hmu a; R Lalzirliana chuan, doctor 26 lak thuai tum a nih thu leh an mamawh doctor chu doctor 26 lak aṭanga pek tum a nih thu a lo hrilh. April 26 vêk khan Health minister Lal Thanzara, Health Secretary leh Principal Director-te an hmu bawk.