Joint YMA-in Rs. 11,04,465 hû ruihhlo an hâl ral

Aizawl khawpui chhung hmun lailia YMA branch pangaa YMA Joint Duty-in ruihhlo an donaa ruihhlo an man sa, Rs. 11,04,465 hû chu nimin tlai khan Dawrpui School kawtah hâl ral a ni a; Elec­tric Veng Local Council chairman Zorammawia Sailo-in mei a dep kai.

Nimina ruihhlo hal ralte chu heroin hawng 17, bûr 91 leh chhin sen 8, Alprazolam mûm 21, khuh damdawi bûr 29, sapzu ûm 8 leh a chanve, rakzu fûn 212 leh proxyvon mûm 16 a ni.

Zorammawia Sailo chuan, ruihhlo zuar, ruihhlo ti ṭhin, rûkru leh mi dang tana harsatna siam ṭhinte chu an dîm dawn lo tih sawiin, an huam chhung aṭanga inthiar fihlim turin a chah a; ruihhlo vanga harsatna tâwkte chu rilru leh taksa damna an an chan theih nan home-ah dah ṭhin a, a ṭul anga an tuamhlawm ṭhin thu a sawi.

YMA Joint Duty hian Septem­ber 3, 2016 aṭanga hma an lak ṭan aṭanga nimin thleng khan ruihhlo kaihhnawihah mi 1,247 an khawm tawh a, chu'ng zinga mi 163 chu home-ah dahin, Police leh Excise hnenah mi 17 an hlan a, Child Welfare Committee hnenah mi pathum an hlan tawh bawk.

YMA Joint Duty-ah hian Dawrpui, Zarkawt, Electric Veng, Chhinga Veng leh Saron Veng branch YMA-te an tel a; ruihhlo do hna an thawh aṭang hian ruihhlo chi hrang hrang eng emaw zat an man tawh a, chu'ngte chu a vaiin Rs. 42,85,500 hùa chhût a ni a; tun ṭum hi ruihhlo an hal vawi ngana a ni.