Kawlbem khuaa HSS building tur sakah MNF ṭhalaite'n thil dik lo awmin an hria
MNF ṭhalaite chuan, School Education minister H Rohluna bial chhung, Kàwlbêm khuaa higher secondary school building tur tia sikul sak danah thil dik lo a awm ngeia an hriat thu an puang.
MNYF hruaitute hian nimin khan Aizawl Press CLub-ah thuthar thehdarhtute an kâwm a; MNYF president K Vanlalvena chuan, Kawlbem HSS building tura sak nia sawi chu a hmunah an enfiah tih sawiin, "Kawlbem HSS a awm hauh lo chunga sikul building sak a ni hi mak kan ti hle," a ti.
K Vanlalvena chuan, March 24, 2017-a Assembly session-a H Rohluna'n zawhna a chhannaah, HSS hawn belh tumna a awm loh thu a sawi bakah, Mizorama HSS list (sorkar leh private) a tarlanah Kawlbem HSS a tel lo tih a sawi a, "Kawlbema HSS building cheng nuai 97.94 senga sak a ni si hi thil mak tak a ni," a ti a; MNF ṭhalaite'n Kawlbema an enfiahnaah pawh, V/C hotute leh YMA hruaitute'n an khuaah HSS a awm loh thu an lo hrilh tih a sawi.
MNYF President sawi danin, RTI Act hmanga an zawhna PWD-in an chhan danin, Kawlbem HSS sakna atan NLCPR sum aṭangin cheng nuai 97.94 hmuh a ni a, August 14, 2014-ah tender chhuah niin, work order pek tak chu Zothantluanga, Luangmual, Aizawl, second class contractor a ni.
Contractor Zothantluanga chu a hming putu chauh nia sawiin K Vanlalvena chuan, "He hna hi Pu Zothantluanga'n a thawk lo a, mi dangin a hming an hawh mai a ni. Building satu hi khatih laia Kawlbem V/C president Thanglura niin an sawi a, amah hi School Education minister Pu H Rohluna unaupa a ni," a ti.
K Vanlalvena chuan, School Education Minister-in Assembly House-ah Mizoramah HSS hawn belh tumna a awm loh thu a sawi laia a bial chhunga HSS building tur sak zawh a ni si chu mak an tih thu a sawi a, "Kawlbemah hian HSS hawn a nih theih nan managing board tun thlenga din a la nih loh thu khawtlang hruaitute'n MNYF-te an lo hrilh hi mak kan ti hle bawk," tiin, thil dik lo, sum insiam tumna a awm ngeia an ngaih thu a sawi.
Zawhna chhangin MNYF President chuan, building sak hi zo tawhin a lang a, mahse, completion certificate an la inpe lo niin a sawi a, "RTI chhannaah chuan, kum 2015 tawpa sak zawh tur anga tarlan a ni," a ti.
MNYF hotute chuan, Kawlbem HSS building tur tia in an sakah, a chhawng chungah computer room, metre 6.3 X 4.5-a zau sak tel tur a nih laiin, tun thlenga sak a la ni lo tih an sawi bawk.
K Vanlalvena chuan, Kawlbem HSS tur sak a nih tawh rau rau chuan, sorkarin tipuitling ngei se an duh thu a sawi a; sorkar sikul tura din nghal a la remchang lo a nih pawhin, khaw ṭhenkhata private school din tawhte anga kalpui dan ngaihtuahsak turin School Education Minister an phût tih a sawi.
MNYF treasurer Lalrindika Chhangte sawi danin, Kawlbemah hian primary school, middle school leh high school a awm a, high school-ah chuan zirlai 40, pawl 9 zirlai 18 leh pawl 10 zirlai 22 an awm mek a ni.