Digi Dhan Mela khâr a ni

Sorkar laipuiin sum fai hmang loa indawrna, 'cashless payment' uar zel a tum vanga khawpui 100-a a buatsaih 'Digi Dhan Mela' chu Mizoramah chuan nimin khan IPR Auditorium-ah khâr a ni a, chief secretary Lalmalsawma'n a hmanpui.

Lalmalsawma chuan mipui, sumdawngte leh banker-te indawrnaah sum fai hmang loa digital hmanga indawr chu khawvel changkannain a ken tel a nih thu sawiin, "Ram changkang apiangah cashless transaction an uar a, Sweden ram chu cashless transaction uar ber ram a ni," a ti a; Digi Dhan Mela hmangin zirtirna uar zawka kalpui a nih thu a sawi.

Chief Secretary chuan, digital hmanga indawr chu mipuiin a ṭangkaizia an hre mek tih sawiin, "Chutih rualin, bank branch awm lohna thingtlang khaw hmun ṭhenkhatah harsatna a awm thei. He harsatna sukiang tur hian sorkarin Reserve Bank of India dawrin bank branch hawn theih lohna hmunah an aiawha transaction khawih thei tur banking correspondent atan a khaw mi ngei ruat tum a ni a, inbiakna a kal mek," a ti.

Digi Dhan Mela hi India ram pumah January thlaah neih ṭan niin, April 14 khan a khârna hun hman a ni a, April 14 hi Good Friday a nih avangin Mizoram sorkar chuan Kristiante ni pawimawhah Digi Dhan Mela hman a remloh thu sorkar laipui a hriattir a, nimin khan khâr a ni ta a ni.

India ram pumah kum 2017-18 chhungin digital transaction target cheng vbc. 2500 a nei a, he hun chhunga Mizoram target chu cheng nuai 150 a ni.