Central congress-ah kan innghat lo - Hawla

Congress party president Lal Thanhawla chuan, Mizoram Congress chu Central-a Congress-ah an in­nghah loh thu a a sawi a, "Central-ah Congress an tlakhniam deuh avangin Mizoram Congress-in danglamna a nei lo," a ti.

Lal Thanhawla hian nimin khan Siaha Bazar Venga vantlang inkhawmah thu sawiin, "Central Congress-ah kan innghat ngai lo. Inthlan lehah pawh Central Congress lo hniam zel palh pawh ni se, Mizoramah kan sorkar dawn tho," a ti a; Mizoramah chuan Congress-in tlakhniam lam aiin hmasawnna a neih zel thu a sawi.

Mizorama Congress party chu Mizorama rawngbawl tura Pathianin a dahte an nih thu sawiin Hawla chuan, "Zoram dung leh vâng thlir ila, hmun tinah lawm luh tur kan la nei zel hi malsawmna kan dawn, party dangin an neih ve loh a ni," a ti.

MPCC President sawi danin, independent hmain chhim lam chu kawtchhuah a ni ṭhin a, tunah kawtchhuah ni leh turin puahchah leh mek a ni. Chuta tan chuan airport tur zawn a ni a, Latawh hmun chu airport siam theihna a ni a, DPR buatsaih mek a ni.

CSS Hindi zirtirtute'n lungawi lohna an lantir laia CM banglaa mi za rual an luh laia a hruaitu ber berte chu MNF ṭhalai hruaitute an nia sawiin Lal Thanhawla chuan, "CSS Hindi teacher an nih lai ka hre lo a, heng mite lakah hian Mara mipuite hi kan fimkhur a ngai a ni," a ti.

MPCC President chuan, eptute'n Congress party an beihna chu, 'Term hnih sorkar hnuah sorkar zawm an awm lo' tih a nih thu sawiin, "Eirukna emaw sawi tur an hre lo. Congress-in Zoramah term thum sorkarna an siam dawn," a ti a; Congress chu Zoram mipui tam berin a záwna ṭum thum sorkartir an tum niin a sawi.