MADC inthlan tura campaign hun a tàwp

May 4, 2017-a Mara Autonomous District Council (MADC) inthlanpui neih tura campaign hun chu nimin tlai dar 5 khan a tawp a; inthlana duty turte chu May 1 khan postal ballot hmangin vote thlaktir an ni a, mipuiin naktukah vote an thlak ang.

MADC-a inthlan turah hian campaign theih hun chu nimin tlai dar 5 khan a tawp a, district pawn lam aṭanga campaign-a kalte chuan nimin tlai khan Siaha district an chhuansan nia thu dawn a ni.

Inthlana duty tur polling party-te chu Thawhṭanni khan vote thlaktir an ni a, polling party 80 zinga Siaha khawpui pawn lama duty tur polling party 50 velte chuan nimin khan Siaha an chhuahsan vek tawh a ni. Siaha khawpui huam chhunga duty turte chuan vawiinah an duty-na tur hmun an pan ve leh ang.

Inthlanna buaipuitu tur presiding officer leh polling officer 320 leh reserve-te chu training pek vek an ni tawh a; inthlanna muanawm leh felfai tak a awm theih nan polling station 80-ah venhimna uluk taka ruahman a ni. Polling station 80 zinga 10, Myanmar ramri hrûla te chu uluk lehzuala ven a ngai a ni a, chu'ngahte chuan police silai keng duty tir an ni.