Zirlai pawlte'n HSLC pass-te an lawmpui

Zirlai pawl pahnih, MZP leh MSU-te chuan nimin khan thu­chhuah siamin, MBSE-in HSLC 2017 Examination result a tichhuak ta chu lawmawm an tih thu leh zirlai pass tharte an lawmpui thu an tarlang.

MZP chuan, HSLC result rang taka tichhuak tura thawktute thawhrimnaah lawmthu an sawi a, "Ram leilung fa zinga miin pakhatna dinhmun a hauh hi kan chhuang a, top 10-a Mizo zirlai 13 an lang hi kan lawmpui tak zet a ni," an ti a; hlawhtlinna hmu zawng zawngte an lawmpui rualin, an hma lam hun atan duhsakna an hlan a, hlawhtlin ve rih lote chu hnual loa theihtawpa bei chhunzawm zel turin an fuih a ni.

MSU chuan, HSLC-a pass percentage 72.17% chu duhthusam ni lo mah se, lawmawm an tih thu an tarlang a; tunlaiin Mizo ṭhalai leh zirlaite'n social network leh games khawiha hun an khawhral nasat avangin zirnaah an tlakhniam phah nia an ngaih thu sawiin, "Social network leh games-te hi a hman dan tâwk thiam turin zirlaite kan ngen a ni," an ti a, zirlai nu leh pate pawh an fate zirna tun aia ngaihven lehzual turin an chah bawk.