Truck neitute'n hriatthiam an ngen

Mizoram Truck Owners' Association (MTOA) chuan thu­chhuah siamin, Tan­hrila FCI kudam bula truck an dah ṭhin chu hnawksak an ni tih an inhriat thu an tarlang a; an dinhmun hriatthiampui turin mipui leh thuneitute an ngen.

MTOA chuan, FCI kudam leh a chhehvel­ah buhfai phur tur leh keuh turin truck-te an dintir ṭhin thu an sawi a, "Mi dang tana hnawk hlau tak leh vantlang laka inthlahrung takin kumtluanin kan awm a. He kudam sawn chhuak tur te, truck dinna hmun min pe turte leh Rengtekawn/Bualpui depot aṭanga load pe mai turtein sorkar vawi tam tak kan dawr tawh a, tun thlengin remchang min siamsak thei rih lo a ni," an ti.

An motor-te chu mana vautu leh thuneitu lama hêktu an neih reng thu sawiin MTOA chuan, "A luhaithlakin a ninawm zozai ve hle," an ti a; Mizoram eibàr phurtu an nihna leh harsatna an tawh kumtluante hriatpui a, hrethiam turin thuneitute leh mipui an ngen a ni.