HSLC-ah IE Scheme hnam ṭan a ni ; Fimkhur taka kalpui MBSE-in a tum

Kumina High School Leaving Certificate (HSLC) Examination aṭangin Integrated Evaluation Scheme (internal mark) hman ṭan a ni a, hei hian zirlaite pass-na division a tihsan bakah, top 10-a tlin danah pawh awmzia a nei hle tih MBSE hotute chuan an sawi a, IES chu fimkhur taka kalpui an tum.

Vanglaini palaiin MBSE Secretary nimina a kawmnaah Secretary Lianhmingthanga chuan, IES (internal mark) hnuaiah hian sikula zirtirtute'n an zirlaite ṭheuh mark an pe a, chu chu MBSE-ah an thehlut tih a sawi.

Internal mark hi induhsakna awm loa pe turin MBSE lamin sikul zawng zawng an hriattir a, mark pek dan tur pawh an zirtir vek laiin, sikul hrang hrangte mark pek dan erawh a inang lo tih zirlaite mark hmuh aṭangin a hriat theih thu dawn a ni.

Kumina HSLC result-ah pawh board subject pangaa mark hmu sang zawk, mahse internal mark nena belh khawm hnua inlehpel an awma hriat a ni. Internal-a 100% mark pe an awm nual a, top 10 zingah pawh internal mark hmuh ṭhat zawk vanga ranking-a inlehpel an awm nual bawk.

IES hian zirlaite'n a pumpuia mark an hmuh zat a tihsan phah a, division sanga pass an tam phah bakah, division hniam lama pass an tlem phah tih a lang.

HSLC 2016-ah distinction-ah mi 629 an pass laiin, kum 2017-ah chuan 1,118 an pass a, kumina an tam zawkna chu 489 a ni. 1st. division-ah kum 2016-ah mi 2,025 pass in, kuminah mi 2,989 an pass a, kumina an tam zawkna chu 964 a ni a; 2nd. division-ah nikumah mi 6,263 pass in, kuminah mi 3,779 an pass a, kumina an tam zawkna chu 269 a ni. Hetih lai hian, 3rd. division-a pass erawh nikumah an tam zawk hle a; kum 2016-ah 6,263 an pass laiin, kuminah chuan 2,671 an pass a, kumina an tlem zawkna chu 3,592 a tling.

Internal mark pek tel a nih tak chung­changa zawhna chhangin MBSE secretary F Lianhmingthanga chuan, nikum lamah Mizorama high school zawng zawnga zirtirtute hnenah mark pek dan tur leh inkaihhruainate zirtir an nih thu a sawi a, "Kan duh dan dik taka hmang turin kan ti. A vawi khatna a ni a, a la famkim lo ang. Siam ṭhat ngai a awm ang a, kan siam ṭha zel ang. Kum 2017-18 aṭangin higher secondary school-ah pawh kan hmang ve leh ṭan dawn a ni," a ti.

F Lianhmingthanga chuan, integrated evaluation scheme (IES) chu India rama kalphung hman mek a nih thu sawiin, "Naupangin lehkha an zir tam phah a, an zirlai an thiam phah tih a chiang. Naupangin zirlai leh sikul an ngaih pawimawh phah a ni," a ti a; IES mark-in 20% leh HSLC exam-a mark-in 80% a put thu a sawi.

MBSE hotute chuan, IES hmaa mark pekah zirtirtute chu dik taka thil ti tura hriattir an nih thu sawiin, hmang sual emaw, thil dik lo tih nan emawa hmang an awm chuan an enfiah zel dawn thu an sawi a, "Hma kan la zel dawn a. Tunah pawh feedback kan dawng nual a, mahse, chumite chuan an ti dik lo tih sawi tur a la awm lo. IES hi an zawm ṭha viauin kan hria," an ti.

Internal mark chu zirlaite pass tirtu a ni lo tih sawiin MBSE hotute chuan, "HSLC-a pass tur chuan board exam leh internal-ah 33% an hmuh ve ve a ngai," an ti.

IES hnuaiah hian sikul tinin an zirlaite chu class test (vawi li), assignment, term exam (vawi hnih), annual/board exam an neihtir tur a ni a; chungte chuan HSLC-ah mark a pu vek a ni. Heng bakah hian attendance, work experience, physical & health education leh art education ten mark a pu bawk.