Vawiinah MADC inthlang dawn

Mara Autonomous District Council (MADC) chu vawiin hian an inthlang dawn. Zing dar 7 aṭanga tlai dar 5 thleng vote thlak theih a ni ang a, May 8-ah vote chhiar a ni ang.

MADC-ah hian bial 25 a awm a, candidate 70 an awm. Congress party-in bial awm zawng zawngah candidate an dah a, Mara Democratic Front (MDF) leh MNF-te thawk dunin, MDF-in bial 13 leh MNF-in bial 12-ah candidate an dah. BJP-in bial parukah candidate an nei a; indepen-dent candidate mi 14 an awm bawk.

MADC-ah hian seat 25 bakah, nominated seat pathum a awm a, sorkarna siamtute'n nominated seat-ah hian dan angin hmeichhe pahnih leh mipa pakhat an ruat thei a ni.

MADC inthlan hnu­hnung berah Congress party-in seat 15 lain sorkarna an siam a, MNF leh MDF ṭang­kawpin seat pariat neiin, independent-a tling mi pahnih an awm. Independent-a tlingte hian a hnuah Congress party an zawm leh a ni.

MADC-ah hian voter mi 37,258 an awm a, chu'ng zinga 17,969 chu mipa niin, mi 19,289 chu hmeichhia an ni.