Hunthar Vengah chhiatna nasa zawk a thlen lohna atan ruahmanna siam
Hunthar Venga lei tawlhna chhaka awm, B Sairengpuii in thlanga lungrem chu Thawhlehni zanlai khan a chim a, Aizawl DC Kannan Gopinathan chuan chhiatna nasa zawk a thlen lohna atan nimin khan ruahmanna a siam.
Aizawl DC chuan, PWD hnuaia Hazard Safety Cell-in B Sairengpuii in chu zir chiangin, April 24, 2017-ah report an thehluh tawh thu a sawi a, "In leh a bul hnaia chhiatna nasa zawk a thlen lohna atan hmanhmawh taka thil tih tur rawtna eng emaw zat an nei a ni," a ti.
Aizawl Bawrhsap hian chhiatna nasa zawk a thlen lohna atan PWD Hazard Safety Cell-te'n rawtna an siamte chu a rang thei ang bera bawhzui turin Disaster Management & Rehabilitation Director a hriattir a ni.
Hunthar Veng Local Council hruaitute chuan nimin khan Aizawl DC chu a pisaah an hmu a; an venga lei tawlh chu kum 25 vel chhung an tuar tawh chunga a min zel lohna tura hmalakna mumal a awm lo chu an hriatthiam loh thu hrilhin, chak zawka hma laksak turin an ngen.
Aizawl Bawrhsap chuan, Hunthar Veng khawtlangin harsatna an tawh chu ven a nih theih nan theihtawp an chhuah tih a sawi a ni.
Hazard Safety Cell rawtna
In rit lutuk tihziaawmna atan ṭhiah ṭhen tur
In bula side drain chhia leh lei khì awmte chu cement-a hnawha silpauline-a khuh tur
Chhim lam leh hmar lama side drain-a tui luangte chu dan chah a, hmun him lama luang tura lâk kawi tur