Buhfai tichingpena puhte Court-ah inlan

Kum 2014-a Kolasib Supply Centre aṭanga buhfai hralh rûknaa inhnamhnawiha puh PL Zohmingliana leh ST Lallawmzuala te chu May 2, 2017 khan Kolasib Chief Judicial Magistrate Court-ah an inlan.

Thu dawn danin, Kolasib DCSO hlui, PL Zohmingliana thubuaiah hian thuhretu mi 14 zinga mi panga chu Court-ah koh an ni tawh a, an zinga mi pahnih chu Court-ah inlan thei lo.

ST Lallawmzuala thubuaiah thuhretu mi 12 zingah mi pariat koh an ni tawh bawk a, mahse, Court-a inlan thei lo an awm nual a ni.

October 8, 2014 tlaiah Kolasib Supply Centre aṭangin 909 truck MZ-05 9591 hmangin buhfai ip 140 phurh chhuah a ni a, chu chu Kolasib District MJA-te'n ûm zuiin, Kawnpui bulah nang­chingin an man. Hemi chungchangah hian Kawnpui Police Station-ah FIR thehluh a ni a, a mawhphurtua puh, chutih laia Kolasib DCSO PL Zohmingliana chu police-in an man a ni.

October 10, 2014-a Kolasib Supply Centre aṭanga buhfai ip 100 phurh chhuah pawh Kolasib MJA-te'n bawhzuiin, Kolasib Saidanah man a ni bawk a; buhfai leitu retailer-te'n Kolasib-a Supply department-a LDC ST Lallawmzuala hnen aṭanga an lei a nih thu an sawi avangin ST Lallawmzuala chu police-in October 16, 2014-ah an man bawk.

DCSO hlui PL Zo­hmingliana hi sorkarin October 10, 2014-ah a suspend a, departmental enquiry lak a nih hnuah a hna aṭangin bàn a ni.