KHAWTHLIR

Career guidance
Hnahthial Officers Club chuan nimin khan Hnahthial market building-ah Hnahthial khuaa high school chin chung lam zirlaite pualin Career Guidance Programme an buatsaih a, zirlai 400 vel an tel. He hunah hian Hnahthiala officer-te'n zirlaite hma lam hun atana pawimawhte an sawi a, zawhna leh chhanna hun hman a ni.

Heroin man
Excise & Narcotics department-a Anti Narcotics Squad-te chuan, nimin zing dar 1:30 khan Selingah heroin gram 14 leh a neitua puh Zohlimpuia (32) s/o Manliana, Dinthar-II, Aizawl nia inchhál an man. Nimin zing dar 4:45 khan Khatlaah heroin gram 58 leh a neitua puh Vanlalhruaii (36) d/o Daisawmpauva, Champhai Kanan Veng nia insawi an man bawk. Nimin zing vek khan Selingah dawidim kg. 70 an man bawk a ni.

Pass-te lawmpui
Students Self-Support Union (SSU) leh Congress party zirlai pawl National Students Union of India (NSUI)-te chuan thuchhuah siamin, MBSE-in HSLC 2017 result a tichhuak ta chu lawmawm an tih thu an tarlang a; zirlai hlawhtlingte an lawm-pui rualin, hlawhtling ve rih lote an tawrhpui thu leh, beidawng loa zir zel tura an duhsak thu an sawi bawk.

Tuia tla chhar
Nimin tlai dar 3 vel khan Langkaih luiah Lalvenhima (kum 23 vel) s/o Vanlalmawia (L), Rengdil ruang chhar a ni a; eng vanga tla nge tih hriat a ni lo.

Lammuala tla thi
I-League-a Aizawl FC an champion lawmna, May 1, 2017 tlaia Lammuala neiha chesual, Lalnunzira, Kolasib Gosen Veng chu a hliam tuar loin nimin zing khan a thi. Lalnunzira hi Lammual chhak lam ko aṭangin a hnuaia khelmualah a tla a ni.

DC-in kawm
Kolasib DC Dr Arun T chuan nimin khan a pisaah Kolasib-a IPRO JH Lalparmawii leh a thawhpuite a kâwm a; sorkar hmalakna leh department hrang hrangte hnathawh puanzar chungchang te, sorkar aṭanga advertisement pek chhuah dan te, NLUP chungchang leh an district-a hmasawnna hna thawh hrang hrang documentary film siam dan turte a sawipui.

Gender budgeting
SIRDPR chuan nimin khan Lunglei BDO conference hall-ah ni thum awh tur, mipa leh hmeichhe intluktlànna chungchang zirhona, 'Training on gender budgeting' an buatsaih. Training-ah hian Lunglei khawpuia hmeichhia village council member 25, MHIP sub-headquarters, Lunglei hruaitu te, MJA hruaitute leh Social Welfare department-a thawkte an tel.

Aizawl Book Fair
Maggie L Ralte leh Bookline, Kolkata-te chuan vawiin aṭang hian Vanapa Hall-ah 10th. Aizawl Book Fair an buatsaih dawn a, minister Lalsawta'n a hawng ang. Book Fair hian May 7, 2017 thleng a awh dawn a ni.