Pisa kal tlai eirukna a ni - CM Hawla

Chief minister Lal Thanhawla chuan, mahni hnaa inthlahdah te, pisaa kal tlaite leh bàn hun hmaa bànte chu eirukna vek a nih thu a sawi.

CM Lal Thanhawla hian nimin khan Lai Autonomous District Council (LADC) pisa a tlawh a; thu sawiin, LADC pisaa thawktute chu ṭhahnemngai tak leh inpe zo taka an hna thawk tura fuihin, mipui tana rawngbawltu an ni tih hria a, an hna chu Pathian rawngbawlna a ni tih eng lai pawha hre turin a chah.

Lal Thanhawla chuan, hmasawnna hna thawh kal zelah Mizoram chhim lam chu Mizoram kawtchhuah pawimawh a la ni thuai dawn tih sawiin, "Kaladan Multi Modal Transit Transport Project kawng siam mek hi hun rei lo têah ram dang nena insumdawn tawnna kawng pawimawh a ni dawn a, Mizoram kawtchhuah a la ni dawn," a ti a; chumi hun atana lo inbuatsaih lawk turin Lawngtlai district mipuite a chah a ni.

LADC pisaa inkhawm hi LADC chief executive member T Zakunga'n a kaihruai a; inkhawm zawhah CEM pisaah MDC-te nen inkawmin, thil pawimawh hrang hrang an sawi. Nimin tlai khan Chief Minister hian helicopter-in Aizawl a pan a ni.