Aizawl dist-ah Liquor card nung 17,295
April thla tawp thleng khan Aizawl district-ah Mizoram Liquor (Prohibition & Control) Act hnuaia zu lei phalna, liquor card nung 17,295 a awm.
Excise & Narcotics department (END) hotute sawi danin, MLPC Act hnuaia zu zawrh a nih hnuah Mizoram pumah mi sing sarih chuang hnenah liquor card pek a ni tawh. Card hi kum khat chhung zel atana tih a ni a, tunah hian tihnun thar (renew) hun hawn mek a ni. Card thar siam duh tan Rs. 340 chawia siam a ngai a, card hlui tihnun nan Rs. 300 chawi a ngai thung.
Aizawla END hotute chuan, tun hnaia END minister R Lalzirliana’n MLPC Act hnuaia zu khuahkhirhna khauh lehzuala bawhzui a nih tur thu a sawi chu chak taka bawhzui a nih thu an sawi.
END hotute sawi danin, Aizawl district-ah zu dawr 21 hawn mek a ni a, chu’ngah chuan Mizoram Home Guard, 1st. Battlion MAP leh 5th. IR Battalion-a zu dawrte a tel. Zu dawrah chuan END-in duty an dah vek a, hmun ṭhenkhatah chuan mi pathumte duty an dah.
END inspector pathumte chu zu dawr pasarih ṭheuh chantirin, dawr hrang hrang an fang kual ṭhin a; sub-inspector-te pawh chan insemin, dawr ven uluk ngai zual bikte nilênga ṭhutchilh cháng an nei ṭhin.
END hotute chuan, liquor card nei lote chu zu dawr chhunga luhtir phal a ni lo tih sawiin, zu lei tumte chu gate-ah card an neih leh neih loh an endik hmasa zel tih an sawi a; zu lei zo chhuakte pawh an lei zat leh card-a ziah luh dan a inmil leh inmil loh enfiahsak zel niin an sawi bawk.
Liquor card chu mi pakhat hminga pakhat aia tam a awm loh nan computerised vek tura tih ni mah se, thawktu indaih lohna leh mipui nawrna avangin kuminah chuan tih theih a ni lo tih sawiin, END hotute chuan, nakkum aṭang chuan computer-a chhinchhiah vek tum a nih thu a sawi a ni.