An eirûk sawi sen loh kan hria - MNF

MNF chuan thu­chhuah siamin, chief minister Lal Thanhawla'n, MNF party-in sorkar hotute zingah eiru sawi tur an hre lo, tia a sawi chu an chháng a; Congress party hotute eiruk nasatzia sawi sên lo an hria niin an tarlang.

MNF thuchhuah chuan, "Congress party hotute eiruk nasatzia hi sawi tur leh ziah sen rual lohin kan hria. A bikin CM Lal Thanhawla department Lottery-ah cheng vbc. 11808.77 chu a sor­karin a tichingpen a ni tih CAG report-in a tarlang," an ti a; Zo Carbon chung­chang te, Dihmunzawla in ṭhiah man to te, MADC-a cheng vbc. 33 chuang chingpente chu engtia sawi fel tur nge, tiin CM an zawt a ni.

MPCC president Lal Thanhawla'n April 28, 2017-a Congress Bhavan-a thu a sawiah, tun hnaia Champhai buainaa sorkar lirthei hâltute leh thâ thawhtu MZP-te phênah party dang hruai­tute an tel tih a sawi nia sawiin, MNF chuan, "PUC hâl a nih khan a phênah tute paty nge awm tih te, December 4, 2003-a CM Zoramthanga'n thutiam a lak dawna Treasury Square-a car vawm chhia a, thutiam la thei loa a haw leh khan tute party nge a phênah awm tihte an zawt.

February 8, 2006-a Revenue Director pisa luhchilha office bungrua suasamtu leh March 14, 2006 zana Revenue office bomb-tu te, June 21, 2007 chhûna DLAO office luhchilha document pawimawh tak tak tichhetu leh DLAO vautu te, January 31, 2007-a Health minister RTlanghmingthanga pisa kai tur danga lunga lo táwngtu te, Secretariat tukverh darthlalang tam tak ti­chhia a, Planning Board motor MZ-01 1965 hâltute an zawt bawk.