Hna thawh zak lo turin zirlaite fuih

Minister Lalsawta chuan, Mizo zirlairte chu hna thawh zak lo tur leh thawh tur awm apiang thawk hreh lo turin a chah.

Mizo High School-in an sikul aṭanga High School Leaving Certificate (HSLC) exam-a pass-te nimina an lawmpuinaah thu sawiin Lalsawta chuan, "Mizorama harsatna lian tak pakhat chu, hna thawk hreh kan tam hi a ni a, hna thawh zak lo ula, thawh tur awm apiang thawk hreh lo ang che u," a ti.

Finance Minister chuan, zirlai hlawhtlinna changte chu Pathian malsawmna an dawnte chhawr ṭangkai a, theih­tawp chhuah zel tur leh thiamna zir zel tura fuih­in, ṭha ve satliah mai ni lo a, ṭha ber nih tum ṭheuh turin a chah a; pass zo ve lote chu beidawng lo a, insiam ṭhatna atana hmang zawk turin a fuih bawk.

Lalsawta chuan, Mizo High School-in HSLC result ṭha tak a nei chu zirtirtu leh zirlaite thawhrimna vang a ni tih a sawi a; result ṭha zawk nei tura ṭan la zel turin a chah a ni.

HSLC 2017 result chhuakah khan Mizo H/S aṭanga exam beitu chu mi 259 an ni a, chu'ng zinga 248 (96%) chu an pass a ni. Academic session kal mekah zirlai 735 an nei a, chu'ng zinga 310 chu pawl 10 zirlai an ni.