Grape wine man neitute pawisa chawitir bâkah thubuai siamsak

Excise and Narcotics department (END) chuan May 27, 2022-a Aizawla grape wine eng emaw zat an mansak neitute lakah thubuai an ziak lut. Grape wine neitute chu an grape wine zawrhte mansak an nih ní-ah pawisa chawitir an lo ni tawh bawk.

RTI Act hmanga zawhna chhangin END SPIO Vanlalmalsawmdawngliana, END joint commissioner chuan, "May 27, 2022-a Aizawla man tâk, Mizorama siam grape wine neitu/ kawltute chu thubuai siamsak vek an ni," a ti a; thubuai ziah luha dan an tlawhchhan chu MLP Act 2019 Section 7(1) a ni tih a tarlang.

Hetih lai hian, March 25, 2022-a council of minister ṭhukhawmin MLP Draft Rules, 2022 pawm tawh mah se, government gazetted-ah chhuah a la ni lo a, chuvang chuan MLP Rules hman theih a la ni lo nia thu dawn a ni. Hei vang hian END-in grape wine an mante tihralna tur dan hman theih a la awm lo.

END SPIO-in zawhna chhanna July 1, 2022-a a pek chhuaha tarlan danin, May 27, 2022-a Aizawla grape wine mante chu Millennium Centre-a mi, MLP Act, 2019 Section 5(1)(b)(c)(d)(e) leh Section 7(1) tlawh­chhana man a ni a; grape wine man tâkte tih zui dan tur zawhna chu, "Sorkarin a ngaih­tuah mek," tia chhan a ni. Hetih lai hian, wine mansakte chu END chuan Rs 3,000 ṭheuh an chawitir a, pawisa inchawitirna receipt/ voucher pawh END chuan an pe a ni.

Champhai leh Hnahlana grape wine siamte chu MLP Act, 2019-in a khap zingah a tel leh tel loh zawhna chhangin SPIO chuan, "Champhai leh Hnahlana grape wine an siam chhuahte hi The Mizoram Liquor (Prohibition) Act, 2019-in a phal loh (a khap) zinga mi a ni a, Mizoram hmun danga grape wine awm/ zawrhte pawh a ṭul dan anga en zui zel tum a ni," a ti bawk.

Kumin May 27-a END-in an man grape wine-a alcohol awm zat chu - Champ Wine-ah 10.90%, Fanai grape wine-ah 5.10%, BCHA grape wine-ah 4.90%, grape wine dangah 6.90% leh apple juice-ah 4.5% a ni.

May 27, 2022-a Aizawla grape wine man chungchangah END minister Dr K Beichhua chuan, grape wine mantu Excise enforcement staff-te chu grape wine man tura kal an nih loh thu June 3, 2022 khan a lo sawi tawh. Chutih laiin, Millennium Centre Dawrkai Association (MCDA) chuan, Millennium Centre-ah zu man tel a nih loh thu an tarlang thung.

MCDA chuan thuchhuah siamin, Millen­nium Centre-a wine mante chu a neitute hnenah pe lêt tur leh an pe lêt lo a nih chuan zangnadawmna pe turin Mizoram sorkar an lo phût tawh a ni.

Mi dangin RTI Act hmang vêka grape wine man a nih hmain mipui hriatah zawrh khap a nih thu chiang taka puanzar a nih leh nih loh zawhna END SPIO-in July 1, 2022-a a pekah chuan, "Grape wine zuar nia hriatte hnenah Assistant Commissioner, END, Aizawl District-in hriattirna a pe. Mizoram sorkar chuan 20.05.2019 khan MLP ACt, 2019 (Act no. 8 of 2019) chu hman ṭan turin Gazette Notification a tichhuak a, hei hi sorkar dan siam mipui hnena hriattirna pek chhuah dan kalhmang dik tak a ni. He danah hian thil tuirîl alcohol telna (grape wine pawh telin) reng reng chu khap a ni," tih a ni.

END SPIO chuan, Mizoramah wine siam turin tu hnenah mah sorkarin inhriatthiamna a pek loh thu a tarlang a, "Dan kalha che hriat an nih chuan dan ding lai tlawhchhanin mansak an ni ang," a ti. "Sorkar hriatthiamnaa wine siam mek hi Excise department-in a hriatpui em?" tih zawhna chu, "Grape siam sa leh siam mek a awm hriat a ni lo," SPIO chuan a ti a; "Sorkar thuneitute hriatthiamnaa wine siam hi dan bawhchhiatna a ni em?" tih zawhna chu, "Sorkarin hriatthiamna lehkha tu mah a pe lo," tia chhàn a ni bawk.