Environment leh lui humhalh turin Theihtawp kan chhuah - EFCC Minister

Environment, Forest & Climate Change (EFCC) minister TJ Lalnuntluanga chuan, environment leh lui dung humhim turin theihtawp an chhuah thu a sawi a, "NHIDCL-te pawh show cause notice (insawifiah tura hriattirna)-te kan pe," a ti.

Vanglaini palaiin a kawmnaah EFCC Minister chuan, kum 2021 tawp lam aṭangin NHIDCL hmalak dan an thlithlai tawh tih sawiin, "Hmasawnna kan duh rualin, environment humhalh kan ngaih pawimawh thu kan hrilh. Forest clearance velah pawh rules anga kal a ṭul thu kan hriattir. DFO-te instruction ka pe a, NHIDCL leh an working agency-te chu February 2022 khan notice pek an ni," a ti a; hmun ṭhenkhatah chuan stay order (hna tàwp tura hriattirna) pek a nih thu a sawi.

TJ Lalnuntluanga chuan, Mizoramah hmasawnna hnathawh a nihin EFCC department chuan uluk takin an ngaihven reng ṭhin nia sawiin, “Tunah pawh NHIDCL-te hnathawh chu DFO-te’n DC nena ṭangkawpin theihtawp chhuahin an vil reng a, environment leh lui dung tichereu lo zawnga hmasawnna hna thawh hi kan duh dan a ni,” a ti.

Mizoram District Forest Act, 1955 a awm thu sawiin Minister chuan, “He dan hnuaiah hian lui 16 chhehvel humhalh turin April 16, 1956 khan Zoram Hriattirna chhuah a ni,” a ti a; chu hriattirna vêk chu April 8, 1965 khan Assam gazetted-ah chhuah leh a nih thu a sawi.

EFCC Minister chuan, Chite River Protection Act an peih tawh thu sawiin, “Lui 16 dang humhalhna tur rules tunah buaipui leh mek a ni a, kan peihfel ṭep tawh,” a ti a; lui dung leh environment humhalh kawngah theihtawp an chhuahzel tur thu a sawi a ni.

TJ Lalnuntluanga chuan, tun hnaia lui dung leh environment humhalh ngaih pawimawhna mipuiin an nei thar chu lawmawm a tih thu sawiin, “Eng ministry hnuaiah pawh EFCC-te’n kum 65 chhung lui dung leh environment humhalhna lama theihtawp an chhuah tawhnain rah a chhuah ṭan niin ka hria. NGO leh mimalte’n harhtharna an chang a, kan lui dung leh environment humhalh kawngah hma kan sawn zel theih beiseina sang tak ka nei a ni,” a ti.