Sorkar kar nan NHM-a thawkte'n A huhoin chawlh an la dawn

National Health Mission (NHM) hnuaia thawkte chuan thla thum chhung, kumin April-June thla hlawh an la thei lo mek a; hei vang hian lungawilohna lantir nan leh an thil phut hrang hrangte tihlawhtling tura sorkar kar nan ni thum, July 11-13, 2022 chhung chawlh (mass casual leave) an la dawn.

NHM Employees Union, Mizoram (NEUM) chuan thuchhuah siamin, tunah hian thla thum chhung hlawh an lak theih loh mek thu leh thla li hlawh la tawh lote pawh an awm thu an tarlang a, "Sorkara kan phût hrang hrang - regularisation (dah ngheh) chungchang te, regular taka hlawh lâk, medical reimbursement, transfer TA chungchangte leh Health department-a hna lak a niha NHM con­tractual staff-te tana ham­ṭhatna min neihtir tura ngennate vawiin thlenga min ngaihtuahsak lo leh hmasawnna a la awm lo hi hriatthiam harsa kan ti hle a ni," an ti.

NEUM chuan, sorkarin NHM contract staff-te hmakhua ngaihtuahtu tur Study Group August 2021-ah a din tawh tih sawiin, “An hmalakna leh report April 2022-a zawh tawh tun thlenga min tihkhawtlaisak te, vawi tam tak sorkar hotute leh department hotute kan dàwr tawh chunga ngaihsak tak tak kan ni lo ṭhin hi hriatthiam harsa kan ti hle,” an ti bawk.

NEUM hruaitute nimina ṭhukhawm chuan sorkar laka an lungawi lohna lantir nan leh an thil phûtte tihlawhtling tura sorkar kar nan July 11-13, 2022 chhung mass casual leave lak an rél a ni. NEUM chuan, a huhoa chawlh lâk an tum chu hreh tak chunga an rêl a nih thu sawiin, “Kan chawlh chhunga thawhpuite leh mipuite’n harsatna kan tâwk a nih pawhin kan dinhmun chhe tak min hriatthiampui turin kan ngen a ni,” an ti.