MGNREGS-a thil fel lo awmte Chhui thuai turin ACB ngen

BJP, Mizoram Pradesh-a Vigilance Cell hotute chuan July 5, Thawhlehni khan Anti Corruption Bureau (ACB) director leh officer dangte an hmu a, MGNREGS, ni 100 inhlawhnaa thil fel lo awmte rang taka chhui turin an ngen.

Mizoram BJP tarlan danin, ni 100 inhlawhnaa Material Component kalpui danah thil dik lo lian tak a awm nia hriain BJP Vigilance Cell chuan Lokayukta-ah complaint an thehlut a, Lokayukta chuan ACB chhui turin June 29, 2022 khan thupek (order) a chhuah a ni.

BJP-in complaint an thehluh chungchanga Rural Development Secretary insawifiahna chu Lokayukta-in thu tlingah a ngai lo nia sawiin BJP chuan, “Criminal case rang taka siam a nih ngei kan ring a, kan phût bawk,” an ti a; ACB chhui tura Lokayukta-in order a tichhuak chu lawmawm an tih thu an tarlang.

Ni 100 inhlawhnaah eirûkna a nasa nia sawiin BJP chuan, “Tualchhung mipui rilru leh khawtlang inrêlbàwlna thlenga tichhetu, a inhnamhnawihte chhui chhuak thuai turin kan phût tlat. MGNREGS kalpui danah VC/LC te kuta thuneihna dah turin kan phût bawk,” an ti a; ACB Director an ngenna chungchangah, an lo ngaihchàn reng tur thu an sawi bawk.