Samagra hnuaia thawkte'n an hlawh tihpun phûtin badge dum an bel dawn

Samagra hnuaia thawk inzawmkhawm pawl, Federation of Mizo­ram Samagra Employee (FEMSE) ruahmanna angin, hlawh tihsan phûtna atan vawiin aṭangin Samagra hnuaia thawkte'n pawn­them (badge) dum an bel dawn.

FEMSE chuan hriattirna tichhuakin, Samagra hnuaia thawkte hlawh ennawn chungchangah sorkar aṭanga thu lawm­awm leh hmasawnna a awm loh avangin July 7, 2022 aṭangin pawnthem dum bel turin thutlukna siam a ni tih an tarlang a, "Samagra hnuaia thawk zawng zawngte'n mahni thawhna hmun ṭheuhah badge dum bel tur a ni tih kan inhriattir e," an ti.

Samagra hnuaia thawkte hian an hlawh tipung tura sorkar kar nan badge dum an bel phawt dawn a, an kal zel dan tur chu FEMSE council extended meeting-in a rel leh dawn a ni.

Tarlan tawh angin, June 10, 2022-a FEMSE inkhawmpuia khuallian chief minister Zoramthanga chuan, Samagra hnuaia thawkte hlawh a pun dawn thu a puang a, "Hun rei tak chhung hlawh ngai reng in hlawh a, in hlawh hi a pung dawn hrim hrim. In hlawh punna zat tur erawh a la hriat loh. In hlawh a pun theihna atan hian Education Minister a ṭang na hle," a ti.

Inkhawmpuiah hian FEMSE chuan resolution pass-in, 'Hlawh punna tur ni 10 chhunga tihfel ngei ni se,' an ti a; ni 10 hnuah pawh hlawh punna tihfel la ni lo mah se, sorkarah beiseina an neih avangin an ngaichâng rih. July 5, 2022-a Council of Minister ṭhukhawmin hlawh punna tur an rèl thlûk tâk loh avangin pawnthem dum bel an rél ta a ni.