KHAWTHLIR

Thisen pe
Suzuki Burgman Club, Mizoram hruaitute chuan kum khat an tlin lawm nan nimin khan Synod Hospital Blood Bank-ah thisen unit li an pe.

Pawngsualtu hrem
April 5, 2020-a hmeichhe naupang pahnih pawngsualtua puh C Lalhmangaiha s/o C Vanlalliana (L), Lunglei Farm Veng chu Lunglei District Court-a special judge (POCSO) chuan July 5, Thawhlehni khan thiam loh a chantir a; hrehawm taka kum 20 chhung lung-ina táng tur leh Rs 5,000 chawi turin a hrem.

Heroin man
Mizoram police CID (Crime) hnuaia police-te chuan July 5, Thawhlehni khan Falkland Vengthar, Aizawlah heroin gram 607 an man a, a neitua puh Lalngaihzuali (38) w/o Tuanthanga, Khawbung an man bawk. Heroin man hi tualchhunga hralhna angin cheng nuai 15 hû leh international market-ah cheng nuai 303.5 hû a ni.

Naupang hamthatna scheme-te sawiho
Lawngtlai bawrhsap Amol Srivastava hoin July 5, Thawhlehni khan a pisaah sorkar department hrang hrang hnuaia hmeichhia leh naupangte hamṭhatna tur scheme-te kalpui dan tur sawiho a ni. Ṭhutkhawmah hian PM Cares for Children Scheme, ICDS, Poshan Abhiyan, Anganwadi, District Child Protection Committee, Beti Bachao Beti Padhao leh hri danna pek chungchangte sawiho a ni a; a kaihhnawih sorkar officer-te an tel a ni.

NSUI-in ngen
Congress party zirlai pawl, National Students Union of India (NSUI), Mizoram State hruaitute chuan July 5, Thawhlehni khan School Education minister Lalchhandama Ralte an hmu a; West Lungdar Middle School Headmistress leh zirtirtu sawn chhuak lo tur leh West Lungdar M/S harsatna chingfel tura ngenna an thehlut. Dampa bialtu MLA Lalrintluanga Sailo-in West Lungdar M/S headmistress Roliankimi leh zirtirtu Khawlrochhunga te khawtlang leh zirlaite duh dana an kal avanga sawn chhuaha a vau chu an duh loh thu Education Minister hnenah an thlen a; zirlaite tana ṭha ber tur ngaihtuah turin an ngen a ni.