Bairabi-Mamit kawng NH-ah puang dawn

Rajya Sabha MP K Vanlalvena chuan Road Transport & Highway minister Nitin Jairam Gadkari hnenah Bairabi leh Mamit inkar kawngpui double lane-a siam tur leh national highway-a puang turin a ngen a; Union Minister chuan, Bairabi-Mamit kawng chu NH atan puan thuai a nih tur thu a lo hrilh.

MP K Vanlalvena hian July 5, Thawhlehni khan Road Transport & Highway minister Nitin Jairam Gadkari leh secretary Giridhar Aramane te chu New Delhi-a an pisaah a kâwm a; Bairabi-Mamit kawngpui double lane-a siam a ṭul thu leh NH-ah puan a ṭul thu an thlen chungchangah Nitin Gadkari chuan, tihhlawhtlin ngei a nih tur thu a lo hrilh a, "Hun rei lo te hnuah NH atana puanna order tihchhuah a ni ang," a ti.

Union Minister chuan, Mizoram leh Manipur dawh zawmtu tur Tuivai lei (bailey bridge) dawh tura ruahmanna awm tawh chu modular bridge 70R siam zawk tura tih a nih thu te, kum 2022-23 budget-ah khung a nih tawh thu te, Tlabung bul Khawthlangtuipui chunga lei dawh tur pawh DPR siam zawh a nih tawh thu te, Home Ministry leh Defence Ministry-te nen an sawiho tur thute a sawi.

Siaha district chhimthlang tàwpa lawng kal theihna khua Lawngmasu thlenga kawngpui double lane-a lai tura nikuma ngenna an thlen tawh chu Zorinpui aṭanga double lane-a kawngpui laih a nih tur thute a lo hrilh.

Sairang leh Tripura inkar kawngpui double lane tura laih mek chu hun tiam chhunga zawh a nih theih nan contractor-te hnenah a hun dika bill pek a ṭul ṭhin thu an sawi a; Lawngtlai aṭanga Sittwa (Myanmar) lawng chawlhhmun panna kawngpui, KMMTTP siam mek chu India ram pum tana pawimawh a nih avangin a hmun ngeia enfiahtu tur MP team tirh an rawt nghal bawk.

MP K Valalvena hi Road and Infrastructure Development Board vice chairman H Lalzirliana, MLA leh PWD executive engineer Lalbiaknunga te'n an ṭawiawm a; Nitin Gadkari chu MoRTH hotute leh NHIDCL hotute'n an ṭawiawm a ni.