Hripui laka fimkhur thar turin mipui chah

Aizawl District Task Force on Covid-19 chuan July 5, Thawhlehni khan an chairman Dr Lalhriatzuali Ralte, bawrhsap hoin Aizawl district-a Covid-19 dinhmun leh Covid vaccine pek dan an sawiho a; hripui laka fimkhur thar turin mipui an chah.

Ṭhutkhawmah hian mahni ina swab test an awm ṭhin thu leh chutianga ti zingah positive si, sorkara inhriattir lo an awma hriat a nih thu sawi a ni a, “Medical facility ngeia inendika inhriattir thlap duhthusam a ni a, hei hian nasa takin hri dona leh invennaah min pui a ni,” an ti.

Mahni ina mahnia sample endikte chu an positive a nih chuan task force-ah inhriattir tur leh fimkhur taka awm turin an chah a; mi tam zawkin Covid vaccine la tawh mah se, tar chak lo leh natna benvawn neite tan a hlauhawm zual bik bakah, thihna a la thlen reng avangin invenpui tawn a pawimawh thu an sawi.

Ṭhutkhawma tarlan danin, Aizawl district-ah Covid-19 vaccine dose khatna la mi 3,58,312 an awm a, chu’ng zinga mi 3,10,230 chuan dose hnihna la tawhin, precaution dose la tawh mi 25,583 an awm. Sikulah naupangte pan chilha vaccine pek an rel a ni.