Covid-19 vei 91 hmuh chhuah belh a ni

July 5, Thawhlehni khan Mizoramah Covid-19 vei mi 91 hmuh chhuah a ni a, positivity rate 18.24% a ni. Nimin khan hripui vei dam tawh mi 44 chhuahtir an ni a, Covid-19 vanga thi an awm lo.

Thawhlehnia Covid-19 positive hmuh hmuh thar mi 91-te chu mipa 38 leh hmeichhia 53 an ni a; ZMC RT-PCR laboratory-a hmuh mi pakhat leh RAT hmanga hmuh mi 90 an ni. Mi 91 zinga 17 chu Horticulture College, Thenzawla mite an ni.

IDSP record angin, Mizoramah Covid-19 vei 2,29,439 hmuh chhuah a ni tawh a, mipa 1,06,797 leh hmeichhia 1,22,642 an ni a, mipa aiin hmeichhia 15,845-in an tam zawk. Nimin tlai dar 5 thleng khan mi 2,28,348 (99.52%) chhuahtir an ni tawh a, mi 706 (0.31%) thi tawhin, enkawl mek mi 385 (0.17%) an awm.

Kum 2011 chhiarpuia mihring awm zat aṭanga chhûtin Mizorama Covid-19 positive hmuh tawh zat 2,29,439 chu 20.91% a ni a; mi 1,000 zelah positive 209 hmuh tawh ang niin, mi 1,00,000 zelah hripui vangin mi 64 an thi tawh ang a ni.

Nimin tlai dinhmun angin, Mizorama district 11 zingah Covid-19 positive awm tawh rih lohna pahnih chauh a awm leh tawh a, chu'ngte chu Siaha district leh Champhai district a ni. Positive active case tamna ber Aizawl district-ah pung zelin, mi 207 an awm tling leh tawh a, Serchhip district-ah mi 61, Lunglei district-ah mi 54 leh Mamit district-ah mi 29 an awm bawk.