Central evaluation team-in sikul 88 an tlawh ; CSS hnuaia Hindi zirtirtu mi 141 an kâwm

MIzorama centrally sponsored scheme (CSS) hnuaia Hindi zirna kalpui dan leh a nghawngte zir chiang tura sorkar laipuiin third party evaluation team, Awadh Research Foundation, Lucknow a rawn tirhte chuan Mizorama sikul 88 tlawhin an enfiah a, Hindi zirtirtu mi 141 an kâwm.

School Education department deputy director (Hindi) Lalchungnunga'n Vanglaini palai zawhna chhanga a sawi danin, Awadh Research Foundation aiawhte hi mi pahnih an ni a, April 5, 2017-ah Mizoram an rawn thleng a, an thlen tûk aṭangin an tih turte an thawk ṭan nghal a, April 27, 2017 khan an zo fel.

April 28-ah Mizoram an chhuahsan a, tunah hian Nagaland-a CSS hnuaia Hindi zirna dinhmun an enfiah leh mek.

Central evaluation team hian Awadh Research Foundation mite hian district panga - Aizawl, Lunglei, Champhai, Kolasib leh Serchhip district-a sikul hrang hrang an fang a; sikul dinhmunte an enfiah bakah, Hindi zirtirtute nen an inkâwm a ni.

Evaluation team hian Aizawl district-ah sikul 22, Lunglei district-ah sikul 24, Champhai district-ah sikul 22, Kolasib district-ah sikul 10 leh Serchhip district-ah sikul 10 an tlawh a; sikul an tlawh zawng zawng zat chu 88 a ni.

Sikul hrang hrang an tlawh bakah hian, an kalna khawpui tinah CSS hnuaia Hindi zirtirtute an kâwm zel a; Hindi zirtirtute hi mi 130 kawma thu zawh chian an tum laiin, mi 141 an kâwm thei tih Lalchungnunga chuan a sawi.

Evaluation team hi Lalchungnunga'n a tir aṭanga a tawp thlengin a zui a; district-a an kalna apiangah an kalna district-a School Education department officer te, RMSA leh SSA hotu te, sikul zirtirtute leh CSS Hindi teacher awm remchangte'n an lo ṭawiawm zel a ni. Lalchungnunga chuan, evaluation team chu CSS hnuaia Hindi zirtirtu rawih ṭhinte'n an ṭawiawm ṭha hle tih a sawi.

Central evaluation team hi sorkar laipui chuan thla thum chhungin report thehlut turin a ti a; hemi chungchangah hian School Education Deputy Director chuan, thla thum hun hi March thla laihawla inṭan a nih avangin, tun thla tàwp lamah chuan evaluation team-in report an thehluh tawh a ngai nia an hriat thu Vanglaini a hrilh.

Awadh Research Foundation hian sorkar laipuia Ministry of Human Resource Development-a an report azirin CSS hmanga Mizorama Hindi zirna kalpui chhunzawm leh chhunzawm loh turah sorkar laipuiin thutlukna a siam tura ngaih a ni.

Mizoramah February 18, 2011 aṭangin CSS hnuaiah Hindi zirtirtu 1,305 rawih an ni ṭhin a, rawih hun chu February 28, 2017 khan a tawp a, an hlawh chu sorkar laipuiin a vaiin a tum a ni. MHRD duh dan angin Appoint­ment of Language Teacher scheme chhun­zawm zel tur chungchangah zir chian hmasak (third party evaluation) phawt tura tih a ni a, chu vang chuan MHRD-in Mizoramah evaluation team a rawn tír a ni.