May chhungin Serchhip district ODF-a puan hman beisei a ni
Serchhip district chu páwn lama inthiar awm lohna, Open Defecation Free (ODF)-ah May 2017 chhunga puan hman tum a ni.
Serchhip district-a Swach Bharat Mission (Gramin) member secretary F Lalsanglura, PHE executive engineer kaihhruaina hnuaiah Serchhip district chu ODF-a inpuang turin hmalak mek a ni a; district chhung thingtlang khuaa SBM hnuaia ek-in sak tharte pawh a hmun ngeia thlalak upload (Geo tagged photo upload) zawh a ni tawh.
Geo tagged photo upload zo hi Mizorama district pariat zinga pathum chiah an la awm.
Serchhip district-a thingtlang khaw hrang hrangah sorkar thuneitute'n ODF-a puan a nih theih nan, declaration drive an kalpui mek a; thawktute chuan ODF-a inpuang turin tih tur hrang hrangte a rang lama tihfel theih an inbeisei a ni.