ACB-in eiruk thubuai paruk La chhui zawh loh an nei

Anti Corruption Bureau (ACB) chuan, tun dinhmunah thubuai (criminal case) la chhui zawh loh paruk leh thubuai chhui zui zel tlak a nih leh nih loh chhui chian mek (preliminary inquiry) 20 an nei mek.

ACB director LH Shan­liana hnen aṭanga Vanglaini thu dawn danin, ACB hian kumin chhungin preli­minary inquiry tih zawh tawh pathum sorkarah an thlen tawh a, rawtna an siam angin sorkarin a lo pawmsak.

Thubuai pahnih chu thil dik lo a awm loa an hriat avangin ACB chuan sorkar hnenah titawp turin an thlen a, pakhat chu criminal case-a kalpui zel turin an rawt thung.

Kumin hian ACB hian complaint pathum an dawng tawh a, chu'ngte nen chuan preliminary inquiry tih mek 20 an nei a; kumin chhung vek hian criminal case an chhui zawh tawhna report (chargesheet) pahnih Court-ah an thehlut tawh a ni.

Complaint an dawnte chu an chhui zui zel ṭhin tih sawiin LH Shanliana chuan, "Preliminary inquiry uluk taka neih ṭhin a ni. Kan chhuina report leh rawtna kan neihte sorkarah thlenin, sorkarin kalpui zel dan turah thutlukna a siam ṭhin. Thubuai kan chhuina kawngah sorkar hotute an inrawlh ngai lo," a ti.

ACB hian complaint an dawnin, preliminary inquiry an ti phawt a, an thil hmuh chhuahte leh rawtna an neihte sorkarah an thlen leh a, sorkar chuan ACB thil chhui kalpui zui zel dan turah thutlukna an siam ṭhin. Sorkar hian criminal case-a kalpui zui zel tur emaw, case siam zui loa tihtawp tur emaw, departmental inquiry-a kalpui turin thutlukna an siam ṭhin a ni.

Zawhna chhangin ACB Director chuan, Mizoram Carbon Product Ltd. chungchangah preliminary inquiry an la zawh loh thu a sawi a, "Inquiry serious takin a kal a, DSP hoa chhui a nih bakah, Addl. SP-in ni tin a vil ṭhin. Chhui zawh hun tur a hriat theih hrih loh a, chhuina aṭangin thil dang kângkaite pawh a awm thei," a ti a; thâ thlah loa ngawrh taka an chhui zel thu a sawi.