MADC inthlan tluang taka neih a ni
Mara Autonomous District Council (MADC) inthlanpui vawi 11-na chu nimin khan Siaha district pumah tluang taka neih a ni a, buaina leh harsatna lian tham a awm hriat a ni lo. Nimin chawhnu dar 2 thleng khan vote 57% a tla tawh.
MADC general election hi nimin khan vote thlak chhinna, mock poll tih hnuah zing dar 7-ah vote thlak hun hawn ṭan a ni a, tlai dar 5 thleng vote thlak hun hawn a ni.
Mock poll neih laiin N.Saikao-ah vote thlakna electronic voting machine (EVM)-ah buaina tenau a awm a, mahse, mipui vote thlak ṭan hun hmain chinfel a ni.
Noaotlah-I ah EVM control unit-ah buai a awm bawk a, EVM danga thlak niin, zing dar 8-ah vote thlak ṭan theih a ni.
MADC-ah hian voter 37,254 an awm a, mipa 17,967 leh hmeichhia 19,287 an ni. Nimin chawhnu dar 2 thleng khan vote 21,592 a tla tawh a, chu chu voter zat aṭangin 57.96% a ni. hmeichhia 11,538 an ni.
MADC-ah hian MDC bial 25 a awm a, nominated seat pathum a awm. Tun ṭum inthlanah hian candidate 70 an awm a; Congress party-in bial zawng zawngah candidate an nei a, Mara Democratic Front (MDF) leh MNF-te thawk dunin, MDF-in bial 13 leh MNF-in bial 12-ah candidate an dah. BJP-in bial parukah candidate an nei a; independent candidate mi 14 an awm bawk.
MADC inthlan hnuhnung berah Congress party-in seat 15 lain sorkarna an siam a, MNF leh MDF ṭangkawpin seat pariat neiin, independent-a tling mi pahnih an awm. Independent-a tlingte hian a hnuah Congress party an zawm leh a ni.