FCI-in buhfai an chhêk khâwl tam Sairang Dinthara FCI kudam satu tur thlan a ni tawh - Ronald Sapa Tlau

Rajya Sabha MP aṭanga July 18, 2020-a chàwl tur Ronald Sapa chuan nimin khan Aijal Club-ah thuthar thehdarhtute a kâwm a; "Vawiin hi Consultative Committee on FCI chairman anga ka hun hnuhnung tur a ni. FCI leh Supply department-te thawhhona ṭhat vangin tun thlengin harsatna nei loin kan awm a, a lawmawm hle. Ka hun chhungin tling lo tak chungin theihtawp ka chhuah ve a ni," a ti a, hriatthiam ngaihna tam tak a neih a rin thu a sawi.

Ronald Sapa Tlau chuan, Mizorama FCI kudam hrang hrangah buhfai chhêk khâwl quintal 2,00,000 vel a awm thu sawiin, "Fûr lai a ni chungin kan dinhmun a ṭha a, thleng leh mai tur quintal 18,000 chuang a awm. Covid-19 léng tur tuma'n an hre lâwk lo a, inrálrin hman a ni lo. Keini lam pawhin harsatna tam tak kan nei. Covid-19 avangin sorkar laipui ruahmannain PMGKY hnuaiah a thlàwnin buhfai sem a ni a, la sem zel a ni dawn," a ti.

Rajya Sabha MP sawi danin, kumin April, May leh June khan PMGKY hnuaiah a thlàwnin buhfai qtl. 3,340 ṭheuh sem a ni. Covid-19 vanga Mizorama tangkhangte hnenah May leh June thla khan qtl. 3,340 ve ve sem a ni bawk.

Hun rei tak buaipui tawh, Sairang Dinthara FCI kudam sak tur chu a hlawhtlinna hmuh chhoh mek a nih thu sawiin Ronald Sapa chuan, "Central PWD kutah dah a ni a, anni hian a satu tur contractor an thlang tawh a, Covid-19 vangin hna an la thawk lo. Sak zawh a nih hunah chuan Ramrikawna FCI-in harsatna a siamte nasa takin a chhâwk dawn a ni. Sairangah hian kudam, buhfai quintal 1,00,000 leng tur sak a ni ang," a ti.

Consultative Committee on FCI Chairman chuan, Champhai leh Khawzawl district châwm thei tur kudam sak a nih dawn thu sawiin, "Khawchhak lam châwm thei tur kudam sak hi kan duhna a rei tawh. Mahse, duh duhin kudam sak ngawt theih a ni lo a, sorkar laipui pawmpuina a ngai zel. Tunah chuan FCI hian kudam sak phalna hi min pe tawh," a ti a; Champhai leh Khawzawl district châwmtu tur kudam chu Khawzawlah sak a nih tur thu a sawi.