MZU-in August 10 aṭangin exam an buatsaih dawn

Mizoram University a hnuaia zirna-in hrang hranga final year (even semester)-te tan kumin August 10 aṭanga September 4 chhungin exam a buatsaih dawn.

MZU atanga thu dawn danin, exam buatsaih tur hi course tina final year zirlaite tan a ni a, University Grants Commission (UGC)-in July 6, 2020-a Revised Guidelines in Examinations and Academic Calendar for Universities in view of Covid-19 Pandemic a tihchhuah anga ruahman a ni.

Exam hi under graduate-ah chuan final year (6th semester) tan a ni a, post graduate-ah chuan 4th semester tan a ni. Final year ni lo, even semester dangte exam chu remchang hmasaah neih a ni ang. Exam turte tana MZU-in question banks a buatsaih chu nimin khan Vice Chancellor-in a tlangzarh. Hetih lai hian, odd semester-te chu August 1, 2020 atangin class tan a ni ang. Even semester atanga odd semester-a kai turte chu internal assessment-a an tih that dan anga kaitir tur a ni.