President candidate Murmu a lo zin ; BJP leh MNF-te nen hun an hmang

July 16, 2022-a India President thlan tura BJP kaihhruai National Democratic Alliance (NDA) candidate Droupadi Murmu chuan nimin khan lehlángin Aizawl a rawn tlawh.

Droupadi Murmu hi Lengpui Airport-ah chief minister Zoramthanga leh mi pawimawh dangte'n an lo hmuak a, Aizawl pan nghalin, Aijal Club-ah a pualin inkhawm buatsaih a ni.

Aijal Club-a inkhawmah thu sawiin Droupadi Murmu chuan, President thlanna awm turah amah thláwp turin BJP leh MNF MLA-te a sáwm. He hunah hian chief minister Zoramthanga, BJP national spokesperson Sambit Patra leh Mizoram BJP president Vanlalhmuaka te pawhin thu an sawi.

Droupadi Murmu chuan Governor Dr Hari Babu Kambhampati nen Raj Bhavan-ah a kâwm bawk a; Mizoram chanchin zawtin, Mizoram chu hmun nuam tak nia a hmuh thu a hrilh.

Droupadi Murmu hi Ports, Shipping & Waterways leh AYUSH enkawltu minister Sarbananda Sonowal, Assam minister Ashok Singhal, BJP MP Dr Rajdeep Roy leh BJP national spokesperson Dr Sambhit Patra ten an ṭawiawm a; nimin vêk khan Lengpui Airport aṭangin Guwahati an pan leh nghal a ni.

July 16, 2022-a President thlan turah hian candidate pahnih an awm a, NDA candidate Droupadi Murmu leh eptu party ṭhenkhatte thlàwp Yaswant Sinha te an ni.

Droupadi Murmu hi kum 1958 khan Odisha-ah a piang a, kum 1997-ah BJP zawmin, kum 2000 leh 2004 khan MLA atana thlan a ni a, minister a ni. May 18, 2015 khan Jharkhand Governor atan lak luh a ni a, June 2022 khan BJP chuan NDA presidential candidate atan an ruat a ni.