Laldenga thlànah pangpar dah

Nimin July 7 kha MNF party dintu Laldenga thih champha a ni a, Treasury Square-a a thlânah MNF hruaitute’n pangpar an dah.

Laldenga thlanah hian a nupui Lalbiakdiki leh MNF president Zoramthanga, chief minister leh MNF hruaitu dangte’n hriatrengna pangpar an dah a, inkhawm tawi neih a ni.

MNF president Zoramthanga chuan, Laldenga din MNF chu kum 1966 aṭang tawhin a ral leh mai rin thu te, thisen chhuah hmang an nih thute politician-te’n an sawi ṭhin tih sawiin, “Amaherawhchu, Mizoramah tualṭo party tlo lo tam tak karah MNF chuan kum 60 hmel a hmu thei a ni,” a ti.

Jet fighter, armour car, laipui, machine gun leh politics nen kawng tinréngin MNF-in beih a tâwk nia sawiin Zoramthanga chuan, "Pathian kaihhruainain a thil tum tihlawhtling turin mal a sàwm a, MNF chu vawiin thlengin a la pár vul zel. Pu Laldenga thih chamah hian kan din chhan Pathian leh kan ram tan tih hi a tehkhâwnga hmangin harsatna karah pawh i ding zel ang u," tiin kal khawmte a sáwm.

Laldenga nupui Lalbiakdiki, MNF adviser pawhin thu sawiin, a pasal chawimawia a awm chu lawmawm a tih thu leh a thlan chunga chawimawinate chu Laldenga pawhin a beisei phâk a rin ngai loh thu a sawi.
Laldenga hi July 11, 1927-ah Lunglei Pûkpuiah a piang a, kum 1944-ah British Indian Army a zawm. Kum 1959-ah Mizo National Famine Front a din a, October 22, 1961-ah Mizo National Front (MNF) tia thlâk a ni. Kum 1986-a inremna thuthlung ziah a nih hnuah Mizoram sorkar lailâwkah chief minister a ni a, kum 1987-a Assembly inthlanah Sateek leh Aizawl North-II bialah thlan tlin a ni a, Mizoram state-a CM hmasa ber a ni.

Kum 1990-ah cancer a ni tih hriat a ni a, Memorial Sloan Kettering Cancer Centre, USA-ah thla thum enkawl a nih hnuah Mizoram pana an haw kawngah Ashford Hospital, London-ah July 7, 1990, India sanaa tlai dar 2:30-ah a thi. A ruang chu July 11, 1990 tlaiah an inah thlen a ni a, July 13, 1990-ah state funeral-a vui niin, tun thlengin Mizo zinga state funeral-a vui awm chhun a ni.