Zamuangah kuhva rah ip 300 man Kuhva rah mante hâl nghal a ni

Hachhek Bial Kuhva Chingtu Pawl (HBKCP) chuan nimin zing khawvar hma khan Zamuangah truck pahniha phurh kuhva rah, Myanmar lam aṭanga lak luh nia hriat an man. Kuhva rahte chu nimin chawhma lam khan hâl a ni.

Kuhva rah man chungchangah hian HBKCP, Langkaih Group YMA leh Hachhek Joint VC-te chuan resolution inṭâwm an siama, an tarlan danin, All NGO leh Joint VC-te chuan nimin zing dar 2:30 khan Zamuang Zero Point-ah truck pahnih - MZ-01 V-5972 leh MZ-01 V-5750 aṭangin kuhva rah ip 300 an man a, truck-te hian ip 150 ve ve an phur. Kuhva rahte chu Chuauliansawti w/o Lalnuntluanga Colney, Kanhmun ta a ni a, Vairengte kudam aṭanga phurh chhuah, Kanhmun kudama dah tur a ni.

Dan loa ram dang aṭanga kuhva rah lak luh chu an duh lo a, vawi tam tak Mizoram sorkarah an thlen tawh tih sawiin resolution chuan, "Dan loa foreign kuhva Mizorama lo lut ṭhin hi kan duh loin kan do tak zet a, ram dang kuhva hian Hachhek bial hi rawn lut tawh lo se kan duh," an ti.

Tun hnuah ram dang kuhva phurin Hachhek constituency an lo lut leh a nih chuan eng harsatna pawh tâwk se, an cho chhuahah an ngaih tur thu an tarlang bawk.

HBKCP hruaitute'n Vanglaini palai an hrilh danin, kuhva rah man chungchangah hian HBKCP hruaitute chu nimin khan inhmu khawmin, FIR thehluh a, sorkar thuneitute kuta hlan an rél. Kawrthah SDO (Civil) leh police-te pawh Zamuangah kalin, HBKCP hruaitute nen an inbia a, an inbiak lai chuan kuhva rah man sate chu a kâng a, chuvang chuan FIR an thehlut ta lo a ni.

HBKCP hruaitute chuan, dan loa Myanmar lam aṭanga kuhva rah lak luh leh Mamit district kaltlanga Mizoram páwna phurh chhuah a awm ṭhin avangin zanah hmun remchang laiah an duty ṭhin tih an sawi.