Vawk suat neitu chhungkaw 2,488 hnena Zangnadawmna pek tur sorkarin a pe chhuak

Vawk pûl hri, African Swine Fever (ASF) vanga kum 2021 chhunga vawk suat neitute hnena zangnadawmna pek tur Rs 10,48,42,200 chu Mizoram sorkar chuan AH&Vety department hnenah sanction order a pe tawh. Zangnadawmna hi vawk suat neitu chhungkaw 2,488 hnena pek tur a ni.

Vawk suat neitute hnena zangnadawmna pek tur chu sorkar laipui leh Mizoram sorkarin a zatvea an intum sem tur a ni a, Mizoram sorkar leh sorkar laipuiin sum an tum tur chu cheng vbc. 5.84 ve ve a ni.

Vanglaini palai zawhna chhangin AH&Vety department hotute chuan, sorkar laipui leh state sorkar tum turte pe chhuakin, sanction order chu AH&Vety department hnenah July 1, 2022 khan Finance department-in a pe tih an sawi.

AH&Vety department hotute chuan, zangnadawmna pek tur sum la chhuak turin directorate-ah bill siam mek a nih thu an sawi a, "Bill hi Treasury-ah kan thehlut leh dawn. Treasury aṭangin AH&Vety department hnenah pawisa thun a ni ang a, district tina a dawngtu turte bank account-ah kan lo thun ang. Sem theih thuai kan beisei," an ti.

AH&Vety minister Dr K Beichhua’n kumin March thla tàwp lama a lo sawi tawh dan chuan, ASF vanga vawk suat neitute hnena zangnadawmna pek tur first instalment Rs 5,84,97,000 chu March 22, 2022 khan sorkar laipuia Ministry of Fisheries, Animal Husbandry & Dairying-in Mizoram sorkarah a rawn pe tawh.

Vawk 10,910 suat neitute tan Mizoram sorkarin sorkar laipuiah zângnadawmna Rs 11,69,94,414 an dil a, chuta ṭanga first instalment Rs 5,84,97,000 chu March 22, 2022 khan sorkar laipuiin Mizoram sorkar a rawn pe. Sorkar laipuiin a pek zat chiah Mizoram sorkarin a pek ve a ngai a, a vaiin Rs 11,69,94,000 tihna a ni.

Zangnadawmna pek tur chu Mizoram sorkar chuan July 1, 2022-ah AH&Vety department hnenah sanction order a pe chauh a; Rs 10,48,42,200 a pek chhuah avangin Rs 11,69,94,000 aṭanga la pek chhuah kim loh zat chu Rs 1,21,51,800 (nuai 121.51) a ni.

AH&Vety department hotute chuan, an department hriatpuina loa khawtlang hruaitute’n vawk an suat a awm ṭhin chu pawi an tih thu an sawi a; nikum khan an hriatpui loha khawtlang hruaitute hmalaknaa vawk suat a tam thu te, chu’ngte chu zangnadawmna pek a ngaih tho thu te, data dik a awm theih nan kumin aṭang chuan department hriatpuinaa vawk suat kalpui zel tawh tura khawtlang hruaitute an duh thute an sawi bawk.