PAHOSS kalpui lo rei tawh; PAHOSS sum K Deposit-ah dah a ni

Aizawl khawpuia traffic jam tihziaawmna atana Mizoram sorkarin a kalpui Parking House Support Scheme (PAHOSS) chu hun rei tak chhung kalpui mumal a ni tawh lo.

Vanglaini thu dawn danin, PAHOSS kalpui mumal theih a nih loh chhan hi PAHOSS atana sum ruahmante K Deposit-ah hun rei tak chhung dah a nih tawh vang a ni a, Finance department-in an la pe chhuak thei lo. PAHOSS atana budget-a sum dah tawh zat chu cheng nuai 7,002 a ni a, in sak ṭanpuina dawng tura thlante hnenah cheng nuai 1,132.30 pek a nih tawh laiin, la pek chhuah theih loh nuai 4,987 chu a táng mek a, K Deposit-ah dah a ni. Ṭanpuina dawng kim tawh mi 15 an awm a, chu’ng mite sum dawn belh khawm chu nuai 154 a ni.

PAHOSS dawng turin Executive Committee of PAHOSS chuan kum 2019 aṭangin mi 403 an thlang tawh a; ṭanpuina dawng zawng zawngte’n parking house an sak zawh vek chuan lirthei - LMV 4,211 leh two wheeler 9,017 dah theih a ni dawn a ni.