Sorkarin an hlawh a tihpun loh chuan Samagra-a thawkte’n hna thawk dawn lo

Samagra hnuaia thawk inzawmkhawm pawl, Federation of Mizoram Samagra Employee (FEMSE) chuan an hlawh tihsan phûtin nimin aṭang khan badge (pawnthem) dum an bel a, hei hian awmzia a neih loh chuan July 11, 2022 aṭangin pisa kai chungin hna an thawk dawn lo a, pen down strike an kalpui dawn.

FEMSE chuan thuchhuah siamin, Samagra hnuaia thawkte’n November 2019 khan an hlawh chungchangah lungawi loin an nawrh tawh thu an tarlang a, “Chumi hmalakna kal zelah sorkarin Study Team min dinsak. Study Team recommendation chu sorkarah thlen a ni a, Finance department lamin hun rei tak an enfiah hnuah leh a kaihhnawih department-te’n an ngaihtuah hnuah CM pawmpuina lak a ni. Cabinet Meeting agenda-ah dah a ni a, kan lawm em em a ni,” an ti.

Beisei taka an thlir leh ngaihṭha taka an awm hnua Cabinet-in a pawm lo chu mak an tih thu tarlangin FEMSE chuan, “Kan rilru a na em em a, zâwldawh taka sorkar nawr reng hi thil theih niin kan hre ta lo a, chuvang chuan na zawka sorkar nawr kan rêl ta a ni,” an ti. Pen down strike-in awmzia a neih loh zel chuan July 15, 2022-ah an kalzel dan tur an ngaihtuah leh dawn thu an tarlang.

(Phek 2-ah zawm a ni)