KHAWTHLIR

Zu kaihhnawih zirho
Mizoram Social Defence & Rehabilitation Board (MSDRB) chuan nimin khan Whitestone Conference Hall, Aizawlah 'Training of state level master trainers on alcohol & it’s effects' an buatsaih a, Social Welfare secretary Arun Mishra-a'n a hawng. Training-ah hian sorkar department, Central YMA leh tlawmngai pawl aiawh mi 23 an tel a, vawinnah chhunzawma zawh a ni ang.

Refresher course
School Education secretary Dr Lalzirmawia chuan nimin khan SCERT Auditorium-ah Aizawl district-a primary school zirtirtute tana buatsaih Refresher Course on Environment Education a hawng. Refresher course hi batch palia neih tur a ni a, July 22, 2022 thleng a awh ang.

NHM thláwp
PC party ṭhalaite chuan, National Health Mission (NHM) hnuaia thawkte thil phût tihlawhtling thuai tur leh an hlawh pe thuai turin Mizoram sorkar an ngen a, NHM-a thawkte thil phût leh a huhoa chawlh lak an tum chu an thlàwp thu an tarlang a, "Mizoram sorkarin NHM hnuaia thawkte hlawh thla thum teh meuh a hrêksak hi hriatthiam harsa kan ti a, a rang thei ang bera pe turin Mizoram sorkar kan ngen," an ti.

Sorkar pawmpui tan chauh phal
Art & Culture department hotute chuan nimin khan Mizo puan panga, Geographical Indication (GI) neite tah, hman leh hman khapna dante an thlirho. GI tag puan panga - Puanchei, Pawndum, Ngotekherh, Hmàrám leh Tawlhlohpuante chu sorkarin puantahtu a pawmpuite chauhin an tah phal a ni tawh dawn. Sorkar pawmpui ni duh tan Art & Culture directorate, Chanmari, Aizawlah zawhfiah theih a ni.

Naupang dan zir
Champhai ICDS District Programme Office chuan nimin khan IPR conference hall-ah kum tling lo naupang, dan bawhchhiatnaa inhnamhnawih emaw, dan bawhchhiaa puhte emaw buaipuia venhim leh enkawl dan zirhona, 'Escort & Management of Children in Conflict with Law' an buatsaih a; Champhai DPO Lalrinmuana'n a kaihruai a ni.

Leiminin hnawl
Nimin zing dar 5 vel khan ruahsur nasa avanga leiminin Rengtekawn, Kolasiba thingpui dawr pakhat a hnawl a, mi pahnih hnawl telin, lakchhuah an nih hnuah damdawi-inah enkawl an ni. Lemin hian scooter pali leh autorickshaw pakhat a delh chhe bawk.

DC-in MRP aia toa Zuar lo turin chah
Legal Metrology controller Dr Andrew H Vanlaldika chuan nimin khan thupek tichhuakin, sumdawng/dawrkaite chu an thil zawrhte a man inziak, maximum retail price aia sanga zuar leh hralh lo turin a hriattir. Dan bawhchhiate chu dan anga hrem an nih tur thu a tarlang a; a man inziak aia toa thil hralh hriate chu Legal Metrology department-ah hriattir turin a chah bawk.