Vairengte aṭanga lo lutte uluk taka Endik a pawimawh - Health Minister

Consultative Committee on Health & Family Welfare-te'n nimina Aizawla quarantine facilitiy-te an tlawhnaah an chairman Dr R Lalthangliana, Health minister chuan, state páwn aṭanga Vairengte kaltlanga Mizorama lut turte uluk taka endik a pawimawh thu a sawi.

Dr R Lalthangliana chuan, Vairengte kaltlanga Mizorama lutte chu mimal lirthei hmanga lut an nih pawhin, kawng lakah châwl lo se an duh thu sawiin, "State páwn aṭanga lo lut zingah mahni motor hmanga Vairengte paltlangte fimkhur leh zual zawkin rawn lut se, ei leh in tur pawh mahni intumin, kawng lakah chawlh loh ni se a ṭha. Fimkhur thilah two wheeler chuan rawn luh phal a ni tawh lo," a ti.

Health Minister chuan, paramilitary force-te Mizoramah rawn lut lo se chuan Mizoram chu Covid-19 lakah a fihlim chhoh ṭan tawh thu a sawi. June 15, 2020 khan kohhran hrang hrang enkawl quarantine centre-te a tlawh thu sawiin R Lalthangliana chuan, "Ram mipui, kohhran hrang hrang leh khawtlang hruaitute'n sorkar hmalakna an thlàwp ṭhat avangin lawmthu ka sawi. Inthlahdah hauh loa kan ṭan tlàn reng a ngai a ni," a ti.