External Affairs Minister-in Mamit a tlawh

External Affairs minister of state V Muraleedharan chuan nimin khan Mamit khawpuia centrally sponsored scheme (CSS) hnuaia hamṭhatna dawngtu te, anganwadi centre, Mamit Higher Secondary School, Mamit College leh District Hospital-te a tlawh.

V Muraleedharan hian Pradhan Mantri Ujjwala Yojana (PMUY) hnuaia gas connection a thlàwna dawngtute an inah a tlawh a, Pradhan Mantri Awas Yojana (Urban) hnuaia in sak ṭanpuina dawngtute in sak mek a hmunah a tlawh bawk. PMUY leh PMAY hnuaia ṭanpuina dawngtute chuan harsatna an neihte an lo thlen a ni.

External Affairs Minister hian July 6, Nilaini chhun khan Mamit DC conference hall-ah Mamita sorkar department hrang hrang hotu te, khawtlang hruaitute leh tlawmngai pawl aiawhte a kâwm a, CSS hnuaia project hrang hrang kalpui dan a sawipui.

V Muraleedharan chuan, Mamit district chu Aspirational District a nih angin chawi kân a ngai tih sawiin, district hmasawnna tura ruahmannate tihhlawhtlin nan theihtawp chhuah turin kal khawmte a chah a; harsatna an thlente chu a theih ang angin DoNER leh a kaihhnawih ministry-ah thlen a tum thu a sawi.

Nilaini vêk khan V Muraleedharan chuan Mamit district-a Bâwngva leh Dárlâk khuate a tlawh a, Gram Seva Kendra Hall-ah khawtlang mipui a kâwm. Minister chuan, Mamit district chu Aspirational District aṭanga khaichhuah a nih theih nan sorkarin theihtawp a chhuah reng thu a sawi.

V Muraleedharan hian Bawngva leh Darlak khuaa health sub-centre a tlawh a, an mamawh an lo thlen. Union Minister hi Mamit DC Lalnunhlua leh sorkar official dangte’n an ṭawiawm a ni.