Minister Thangtea’n sorkar laipui a dàwr

Minister Dr R Lalthangliana chuan nimin khan a department enkawlte hmachhawp hrang hrang bawhzuiin New Delhi-ah sorkar laipui hotute a dawr. Minister hi Health & Family Welfare Board vice chairman Dr ZR Thiamsanga, Road & Infrastructure Development Board vice chairman H Lalzirliana leh ZMC registrar Dr Jane Ralte ten an ṭawiawm.

Sorkar thuchhuah tarlan danin, Dr R Lalthangliana hian Ministry of Micro, Small & Medium Enterprises (MSMEs) secretary BB Swain hnenah Mizorama industry-te tihchangtlun a ṭul thu a hrilh a, Aizawl Luangmual, Lunglei, Champhai leh hmun hrang hranga industrial growth centre-te tihchangtlunna tura project an thehluhte tihhlawhtlin a nih theih nan theihtawp chhuah turin a ngen. MSME Secretary chuan chak taka bawhzui a tum thu a lo hrilh.

Land Port Authority of India (LPAI) chairman Aditya Mishra nen an inkawmnaah LPAI Chairman-in Kawrpuichhuah Integrated Check Post tihchangtlunna tur DPR awm sa cheng vbc. 170 hû chu ennawn a nih hnuah vbc. 552.25-ah tihpun a nih thu Dr Thangtea a lo hrilh. DPR chu chawlhkar hnih kal taah Ministry of Home Affairs-ah an thehluh tawh thu leh a hlawhtlin ngei an beisei thu leh, Zokhawthar leh Zorinpuia land custom station tihchangtlunna tur DPR an siam mek thu a sawi.

R Lalthangliana hian MHA additional secretary Piyush Goyal leh Foreign secretary Vinay Mohan Kwatra hnenah LPAI-in Kawrpuichhuah ICP tihchangtlunna tur DPR an thehluh leh border trade kaihhnawih thil pawimawh dangte chak zawk leh awmze nei zawka lo bawhzui sak turin a ngen bawk.

Dr R Lalthangliana hian Health and Family Welfare minister Dr Mansukh Mandaviya pawh a pisaah a kâwm a, Zoram Medical College tihchangtlunna tur concept paper-te a thehluh bakah, Mizoram sorkara Health department hmalaknate a sawipui a ni.