HC Judge-in District Court a tlawh

Gauhati High Court judge Justice Michael Zothankhuma chuan nimin khan Kolasib District Court a tlawh a, Court leh Mizoram sorkar official-te nen an inkâwm.

Kolasib District Court-a inkawmhonaah Justice Michael Zothankhuma chuan, Court-in file a kalpui te, case awm mek te, District Court-in mamawh a neihte leh quarters te, hmabak an neih chungchangte a sawipui a; Kolasib-a ukilte nen an inkâwm bawk.

Inkawmhonaa tarlan danin January-June, 2022 chhungin Kolasib district-a Fast Track Court, Chief Judicial Magistrate cum Senior Civil Judge leh Judicial Magistrate I & II-a thubuai lut zawng zawng chu 733 a ni a, kum hmasa lam a thubuai ziah luhte nen kuminah thubuai 736 chinfel tawh niin, thubuai ngaihtuah tur 306 a la awm.

Gauhati High Court Judge hi DC Circuit House-ah bawrhsap John LT Sanga, SP, District Jail Superintendent, Excise & Narcotics hotute leh Kolasib MJA-te nen an inkâwm bawk a; thawhhona ṭha a awm theih dan tur te, District Jail-a awmte hriselna enfiah dan tur te, mipui hriat atana dan pawimawh zualte inzirtir dan turte an sawiho.

Justice Michael Zothankhuma hi Aizawl aṭangin Gauhati High Court registrar Joel Joseph Denga leh joint registrar Gracy L Bawihtlung leh Aizawl District & Sessions judge Lalbiakzama ten an ṭawiawm a; Kolasib DC John LT Sanga, Fast Track Court judge Julie Lalrinzami, chief judicial magistrate Vincent Lalrokima leh District Court-a thawkte’n an lo dawngsawng a ni.