NSUI-in primary zirtirtu exam Buatsaih ṭha turin CEM ngen

Congress party zirlai pawl, National Students’ Union of India (NSUI), Lawngtlai district chuan June 7-8, 2022 chhunga primary zirtirtu exam-a thil fel lo awmte chingfel tura ngenna lehkha nimin khan LADC chief executive member V Zirsanga hnenah an thehlut a; exam buatsaih ṭha leh turin an ngen.

NSUI, Lawngtlai district chuan, primary zirtirtu exam-ah thil fel lo lian tak mai a awma an hriat thu leh press release pawh June 14 khan an siam tawh thu an tarlang a, “Mizoram leh India ram hmun dangah pawh competitive exam-a invigilator-te’n candidate-te question an hrilhfiahsak hi a awm kan hre ngai lo a, kan ram a thil thleng atan a zahthlakin a ṭha lo hlein kan hria,” an ti.

NSUI tarlan danin, Education department-in zirtirtu lâk tura exam an buatsaihah exam laiin phone ken luh a ni a, invigilator-te pawhin candidate ṭhenkhatte chu zawhna an hrilhfiah sak a ni. Candidate-te aṭangin sawiselna nasa tak hmuh leh hriat tur a awm bawk.