Chiahpuam sum sem dan siam turin Gauhati High Court-in DC a hriattir

6th May, 2017

Gauhati High Court (GHC), Aizawl Bench chuan, chiahpuam pawisa sem dan ngaihtuah turin Aizawl DC a hriattir. Hetih lai hian, GHC vek hian Mizoram sorkar chu chiahpuam chu criminal case-a kalpui a nih theihna atan thutlukna lo awm tawh appeal turin a hriattir bawk.

Sorkar ukilte hnen aṭanga Vanglaini thu dawn danin, January 6, 2013 khan Aizawl District & Session Court-a Chief Judicial Magistrate (CJM)-in chiahpuam sumte chu sem turin Aizawl DC a hriattir a, chumi hnuah, CJM thutlukna chu GHC, Aizawl Bench-ah sawisel an awm a ni. GHC chuan Mizoram sorkar hnenah CJM thutlukna chu an khinlet (appeal) loh chhan a zawt.

GHC thu ngaihtuah hian khatih laia DGP hoa police hotute leh sorkar ukilte chu an inhmuhkhawm a; sorkar ukilte chuan, CJM thutlukna chu appeal loh ṭha an tih zawk thu an sawi a, police hotute chuan sorkar ukilte thuràwn angin GHC-ah chhanna an thawn a ni. Chumi hnuah Mizoram sorkar chuan chiahpuam thubuai chungchangah hian special public prosecutor atan H Lalmuankima a ruat.

Special PP H Lalmuankima chuan CJM thutlukna chu Aizawl District & Session Court-ah thubuai chu criminal case-a kalpui a nih theihna atan a khinglet a ni. Thubuai hi ngaihtuah a ni tawh a, mahse, GHC vekin thu dang a neih leh avangin ngaihtuah zui a ni hrih lo.

GHC hian tun hnai khan thupek chhuahin, Aizawl DC chu Finance department nena ṭangkawpa chiahpuam sum sem dan tur lo ngaihtuah turin a hriattir a; thubuai hi May 22, 2017-ah ngaihtuah leh a ni ang.

Hetiang a nih avang hian chiahpuam thubuai criminal case-a kalpui a nih theihna tura khinletna chu ngaihtuah zui a ni hrih lo. Sorkar ukilte chuan, GHC-in chiahpuam pawisa sem dan ngaihtuah tura Aizawl DC a hriattirnaa an thutlukna nghah hrih ṭha an ti a ni.

Hetih lai hian, chiahpuam thubuaiah hian CJM-in thutlukna pakhat a siam tawh a, mahse, thubuai dang panga chinfel loh a la awm. Thubuai pangate chu engtin nge a kal zel dawn an la hriatthiam bik loh thu sorkar ukilte chuan Vanglaini an hrilh.

Chiahpuam sum hi tun dinhmunah a pung nen cheng nuai 1,300 chuang a awm. Chiahpuam sumah an ta a tela ngaitu (claim-tu) zat hi depositor association lamin list an siam hnuah tihdanglam leh a nih avangin a zat chiah sorkar ukilte chuan an hre thei lo a ni.