Doctor 4 Champhaia awm chhâwk turin ti
Mizoram sorkar chuan sorkar hnuaia thawk doctor zinga paediatrician (naupang lam thiam bik) palite chu Champhai District Hospital-ah a inchhawk (rotation basis)-a awm tura tihna thupek a tichhuak.
Paediatrician doctor palite Champhai District Hospital-a a inchhawka awm tura tihna officer order hi nimin khan Health Secretary-in a tichhuak a; order-a hming langte chu, Aizawl Civil Hospital-a awm mek pathum - Dr Lalrochhuanga, Dr Lalrinzama leh Dr Doris Lalnunmawii Sailo leh, State Referral Hospital-a awm mek Dr Biakthansangi te an ni.
Hetih lai hian Health department chuan thuchhuah siamin, Mizoram sorkar hnuaiah doctor indaih lohna a nasa hle tih a tarlang a; chuti chung chuan Champhai khuain Champhai District Hospital-a naupang lam thiam doctor, paediatrician dah an phût chungchangah hmalak a nih thu an puang.
Health department thuchhuah chuan, Mizoram sorkar hnuaiah doctor indaih lohna a nasa avangin district tina damdawi-inah te, damdawi-in dang - community health centre leh primary health centre-ahte mamawh tâwk sorkar aṭangin doctor nghet pek theih a ni lo tih a tarlang a, "Sorkar laipuiin kan mamawhnate hriain National Health Mission (NHM) hnuaiah eng emaw zat contract basis-in doctor mamawhna min tumsak zawk a ni," a ti.
Tun hnaiah Champhai khaw mipuite'n Champhai District Hospital-a doctor dah belh ngiatin nasa takin sorkar an nawr bakah, Mamit te, Siaha te, Lawngtlai leh hmun dang aṭangin doctor dah belh ngenna a lut reng tih a tarlang.
Doctor indaih lohna chu sorkarin a hria tih sawiin, Health department chuan, "Doctor post ruak hnawhkhat turin chak takin hma a la a, tunah hian doctor post ruak 26 hnawhkhahna turin sorkarin a tih tur chin a tifel tawh a, dan ang taka doctor lakna tur hi MPSC kutah a awm mek a ni," an ti a; sorkar hmalaknate chu dawhthei taka ngaichâng turin mipui an ngen a ni.