Fastest Moving City in NE - Aizawl India ram khawpui faiah Aizawl 105-na
Sorkar laipuia Urban Development minister M Venkaiah Naidu chuan May 4, 2017 khan New Delhi-ah India rama khawpui fai thlanna Swachh Survekshan Awards a puang. Indore, Madhya Pradesh chu khawpui fai ber a ni a, Aizawl chu 105-na a ni. Aizawl hian hmarchhak state zingah hmasawn chak ber, Fastest Moving City in North East Zone a dawng.
Swachh Bharat Abhyian hnuaia Swachh Survekshan-ah hian India rama khawpui 434 endik a ni a, chungte chu mihring 1,00,000 aia tam chenna khawpuite a ni. Swachh Bharat hnuaia khawpui fai thlanna hi kum 2016 leh 2014 khan neih a lo ni tawh a; kum 2016-ah chuan mi nuai 10 chenna khawpui 73 enfiah niin, kum 2014-ah chuan mi 1,00,000 chin chenna khawpui 476 enfiah a ni. Enfiahna (survey) chu kumin January leh February thla chhung khan neih a ni.
Khawpui 434 endik zingah hian hmarchhak state-a khawpui 12 enfiah a ni a; khawpui 434 zingah Aizawl chu 105-na niin, hmarchhak state-a khawpui zingah a sang ber dawttu a ni. Hmarchhak biala fai ber chu Sikkim khawpui Gangtok a ni a, Gangtok hi India ram pumah 50-na a ni thung.
Aizawl khawpui chu Fastest Moving City in North East-ah thlan a ni a, Gangtok chu hmarchhak state khawpui (capital) zinga fai bera puan niin, Assam-a Nagaon khua chu state capital ni lo zinga khawpui fai ber (NE region)-ah puan a ni bawk.
Aizawlin Fastest Moving City in North East Zone award a dawnah hian a dawngtuah Aizawl Municipal Corporation (AMC) ziah lan a ni a; mahse, award hi AMC lam aiawhin an dawng lo. AMC mayor PC Lalhmingthanga chuan, Aizawlin award a dawn hi Aizawl aiawhin UDPA department lamin an dawng nia an hriat thu leh, an hriatpui lutuk loh thu Vanglaini palai a hrilh.
Hetih lai hian, Uttar Pradesh-a Gonda khua chu khawpui bâl/ṭawp bera puan a ni a, Bhusawal (Maharashtra) leh Bagaha (Bihar) ten an dawt.
Khawpui fai zualte
Dinhmun Khawpui
1-na Indore (MP)
2-na Bhopal (MP)
3-na Vishakhapatnam (Andhra)
4-na Surat (Gujarat)
5-na Mysuru (Karnataka)
6-na Tiruchirapally (Tamil Nadu)
7-na Delhi
8-na Navi Mumbai (Maharashtra)
9-na Tirupathi (Andhra)
10-na Vadodara (Gujarat)
50-na Gangtok (Sikkim)
105-na Aizawl (Mizoram)
NE-a khawpui dinhmun
Khawpui Swachh Swachh
Survekshan Bharat
Ranking Ranking
2017 2014
Gangtok (Sikkim) 50 10
Aizawl (Mizoram) 105 35
Imphal (Manipur) 122 83
Guwahati (Assam) 134 51
Nagaon (Assam) 161 -
Kohima (Nagaland) 208 -
Itanagar (Arunachal) 216 -
Shillong (Meghalaya) 276 120
Dimapur (Nagaland) 277 76
Silchar (Assam) 280 -
Agartala (Tripura) 290 32